Kim Kielsen pissaaneq pilllugu: Partiit anginersaat suli peqatigaarput

- Danmarkimi qinersisartut oqaloreerput, tamannalu soorunami ataqqissavarput, Kim Kielsen KNR-imut oqarpoq.

Naalagaaffeqatigiinnermili saamerliit ajorsarnerat uggoraa, Kalaallit Nunaanni saamerliit Folketingimi taasinernik qanorluunniit amerlatigisunik pissarsisinnaagaluarpata piviusunngortussaq.

Pissutsilli ajornerunngillat, Kim Kielsen oqarpoq.

Partiit annersaat suli peqatigigaat

- Qinersinerput aalajangiusimajumavarput, tassalu Folketingimut isertitaqassagutta Socialdemokratinik suleqateqarneq. Tamanna soorunami sunniuteqarnitta annikinneruneranik isumaqarsinnaavoq, kisianni Socialdemokratit partiini suli annerpaapput taamaalillutillu sunniuteqarsinnaallutik.

Danmarkimilu ulluni aggersuni naalakkersuisunngortitsiniarnissaq tamaviaarnarsinnaassaaq. Dansk Folkeparti, partiit annersaata tulleriligaa, naalakkersuisooqataajumanerminnik maannamut ilumuunnginneraasarsimapput.

Partiip siulittaasua Kristian Thulesen Dahl DR-imut ima oqarpoq:

DF-imeersoq nuannaarluinnartoq

- Dansk Folkepartimut pisut ullumikkut piviusorpalaanngeqaat. Upperilluinnarpara tassuugu itissasunga paasissallugulu qineqqusaarnermi ullut pingasut suli sinneruttut.

Kalaallit Nunaanni taasinerit sumulluunniit sammissagaluarpata talerperliit Folketingimut qinersinermi ajugaapput.

Dansk Folkeparti naalagaaffimmi Danmarkimi partiit annerpaartaata tullerilerpaa - taamaallaat Socialdemokratinit, unnuk manna pissaanermik annaasaqartunit, qaangerneqarsimalluni.

Qinersinermi taasiartortut ikittuinnaasut

Maani nunatsinni 2011-mi qinersinermut kingullermut sanilliullugu taasiartortut suli ikinnerunissaat ilimanarsiartuinnarpoq.

Nuummi taasiartortut procentinngorlugit taasisinnaatitaasut taamaallaat 50,7 procenteraat. 2011-mi qinersinermi taasiartortut 58,4 procentiusimapput.