Folketingimut qinersineq
IAp aamma Siumup Løkkemut piumasaqaatitik saqqummiuppaat
Lars Løkke Rasmussenip IA-meersoq Aaja Chemnitz Larsen Kalaallit Nunaanni isertitsiveqartarneq pillugu oqaluuppaa sapaatiummat. Siumumit Aleqa Hammond oqaaseqarpallaanngilaq
Inuit Ataqatigiit sinnerlugit Folketingimut ilaasortanngoqqammersoq Aaja Chemnitz Larsenip, Venstremi siulittaasoq Lars Løkke Rasmussen sapaatiummat oqaloqatigaa.
- Ataatsimiilluarpugut. Lars Løkke Rasmussenimut piumasaqaatigut saqqummiuppakka, Aaja Chemnitz Larsen Sermitsiaq.AG-mut oqarpoq.
- Qineqqusaarninni anguniakkakka saqqummiuppakka, taakkulu anguneqartariaqartut oqariartuutigaara, Aaja Chemnitz Larsen oqarpoq.
Isertitsiveqarneq
Kalaallit Nunaanni isertitsiviit pitsaanerulernissaat ilaatigut piumasaqaatigineqarpoq.
- Danmarkimi isertitsivinniissimasut inuiaqatigiinnut utertinneqarnissaannut suliniuteqartarpoq. Naak isertitsiveqarnermut tunngasut Kalaallit Nunaannut assingusumik suleriaaseqartartussaagaluartoq assingusumik periarfissiisoqarneq ajorpoq. Tassami sulilernissamut ilinniaqqinnissamullu periarfissiisoqartarpoq. Tamanna aamma Kalaallit Nunaanni periarfissaaleqqittariaqarpoq, Aaja Chemnitz Larsen oqarpoq.
Aamma isertitsiviit pitsaanerulertariaqartut oqaatigaa. Isertitsiviimmi aserfallassimapput illoqarfinni assigiinngitsuni.
- Assersuutigalugu Sisimiuni isertitsivik barakkiuvoq qangarnisaq. Taanna nutarterneqartariaqarpoq, Aaja Chemnitz Larsen oqarpoq.
Aningaasanut inatsimmut isumaqatiginninniarnerni Inuit Ataqatigiit isumaqatiginninniaqataalernissaat piumasaqaatigineqarpoq. USA-mut illersornissamut isumaqatigiissut 1951-imeersoq aamma nutaanngorsarlugu isumaqatiginninniuteqaqqittoqartariaqartoq Aaja Chemnitz Larsen isumaqarpoq.
Aleqa Hammond Lars Løkke Rasmussenilu
Siumut sinnerlugu Folketingimut ilaasortanngorlaap Nuummiittup Aleqa Hammondip Lars Løkke Rasmussen sapaatiummat aamma oqaluuppaa.
- Ullumi ataatsimiilluarpugut. Ataatsimeeqqissaagut, Aleqa Hammond naatsumik oqarpoq.