Siumumi maanna saqqumiinnartumik assortuupput

Kim Kielsenip illoqarfiit pingaarnersaannut pilersaarusiaq naliliiffigereeraalu, Siumumeersoq Martha Lund Olsen maanna partiimi siulittaasuminut sakkortuumik saassussivoq. Kielsenip ''isumaannakkut pilersaarutaanerarlugu'' oqaatigaa.

Aamma atuaruk: Kielsen Nuummi suliniut pillugu: Isumaannakkut pilersaarut

- Naalakkersuisut siulittaasuat isumaqatiginngilluinnarpara Nunatsinni illoqarfiit pingaarnersaata Nuup pilersaarutaanut sakkortuumik uparuaammat, Martha Lund Olsen tusagassiuutinut paasissutissiinermini naqissusiivoq, taamaalullunilu maanna borgmesteri Asii Chemnitz Narup (IA), ippassaq Kielsenip pilersaarutinut saassussineranut ''ilumuunnginneraalluinnarnera'' tupaallannartumik tapersiivoq.

Taakku marluk Kommuneqarfik Sermersuumi borgmesterinngorniuupput.

Politikkikkut killissaq isumaqatigiinngissutaasoq
Kim Kielsenip Martha Lund Olsen apriilip sisamaanni Kommuneqarfik Sermersuumi kommunimut qinigassanngortinniartoq paasinarsimmat Kommuninut, Nunaqarfinnut, Isorliunerusunut, Attaveqarnermut Ineqarnermullu Naalakkersuisutut januaarip naanerani soraarsippaa.

Aamma atuaruk: Kim Kielsenip Martha Lund Olsen soraarsippaa

Nuup allineqarnissaanut pilersaarutit annertuunut tunngatillugu politikkikkut killissaq partiimi avissaartuussutigineqartoq ammasumik oqaatigaa.

- Sermersuup kommunalebstyrelseani Siumut pilersaarummut ilusilersueqataallunilu maannamut pilersitseqataavoq, Martha Lund Olsen oqarpoq.

Aamma atuaruk: Siorarsiorfik – qineqqussaarnermi suliassaq pitsaavallaanngitsoq

- Taamaattumik pilersaarummik Kim Kielsenip piviusorsiunnginneraanini nammineerluni akisussaaffigisariaqarpaa, Siumummi taama isummernikuunngimmat, taanna oqarpoq.

Soraarsitaaneq aamma nuutsitaaneq iluarinngikkaa
Martha Lund Olsenip siornatigut soraarsitaanini uggoralugu oqaatigereerpaa, tassani Kim Kielsenip maanna naalakkersuisoqatigiit ukiaq pilersinneqarneranut atatillugu isumaginninnermut naalakkersuisoqarfimmit attaveqarnermut akisussaasunngortikkamiuk, taamaalillunilu kiffartuussinissamut isumaqatigiissutit akerlerineqaqisut akisussaaffigilerlugit.

Tamatuma kingorna Martha Lund Olsen Kielsenip isumaginninnermut naalakkersuisortaavanut, Sara Olsvigimut (IA) § 37 naapertorlugu isornartorsiorpalaartunik arlalinnik apeqquteqarnikuuvoq.

Aamma atuaruk: Martha Lund Olsen naalakkersuisoqarfigisimasaminut isornartorsiuisoq

Akiliisinnaajunnaassanngitsoq
Kommuneqarfik Sermersuumi kommunalbestyrelsip aningaasaliinissamut pilersaarutit saqqummiussaanulli Martha Lund Olsen isornartorsiorpalaarnerusumik isummerluni oqariartuuteqarnikuuvoq.

- Kommuni ukiuni 30-ni tulliuttuni pisinnaasani qaangerlugu aningaasaliisimanini pissutigalugu akiliisinnaajunnaannginnissaa siullermik qulakkeertariaqarparput - tamanna Savalimmiuni aamma Islandimi takoreerparput, Martha Lund Olsen februaarip 28-anni atuartartutut allagaqarpoq.

Isuma nutaaq
Maanna akerlianik Nuup pilersaarusiorneqarnera pillugu politikkikkut sulisimaneq akuersaarfigineruaa.

Atuaruk: Innuttaasut affaat Nuummi najugaqassapput

- Taamaaliorpugut Nunarput isumannaatsumik ineriartussappat Nuup ineriartornermi tassani siuttuunissaata qulakkeerneqartariaqarmat, Martha Lund Olsen allappoq.