Siorarsiorfik

Kielsen Nuummi suliniut pillugu: Isumaannakkut pilersaarut

Siumup partiimi siuttua, Kim Kielsen, Kalaallit Nunaata oqaluttuarisaanerani illoqarfinnik ineriartortitsinerni suliniutit annersaat Siorarsiorfimmik taaneqartoq maanna qinnequsaarnermi ''neriorsuuteqarfigivallaarneqarnissaata'' mianersoqqussutigaa

Siorarsiorfik
- Illoqarfiup immikkortua nutaaq sullorsuarmik Nuummut atassuteqassaaq, Kim Kielsen suliniut Siorarsiorfik pillugu taama oqarpoq.

- Siumup kommunimut qinersinissamut saqqummiussinermini suliniut annertooq oqaatsimik ataasinnguamilluunniit taaneqannginneranut apeqqummut, suliniut piviusulersaartuunersoq ilisimaneqanngitsoq, Kim Kielsen allappoq.

Aamma aturuk: Nunatta oqaluttuarisaanerani inissianut pilersaarut annerpaaq

Kommuneqarfik Sermersuumi kommunalbestyrelsi tamarmiusup borgmesteri Asii Chemnitz Narup IA-meersoq siuttoralugu pilersaarutit annertuut februaarip 7-anni tusagassiorfinnut saqqummiukkaluarpaat. Inissiat 1600-t, paaqqinnittarfiit, atuarfiit, sullorsuaq, issittumi arsaattarfissuaq aamma inuussutissarsiortunut inissiat 4 aamma 5 milliardit koruunit akornanni akeqartussat.

Saqqummiussinerup piffissaa eqqarsarnartoq
- Illoqarfiup ineriartortinneqarnissaanut suliniutip aningaasartalerneqanngitsup saqqummiunneqarnerata piffissartaa eqqarsarnarpoq. Saqqummiussinissamut atortut aamma titartagartaasa ilusilersorneqarneri misissueqqaarnernit, pilersaarusiornernut aamma suliniummut aningaasaliissutit paasineqarnissaannit nukiit atorneqarnerusimarpasipput, Kim Kielsen allappoq, borgmesterilu IA-meersoq sakkortuumik isornartorsiorlugu.

Aamma atuaruk: Siorarsiorfik – qineqqussaarnermi suliassaq pitsaavallaanngitsoq

- Kommuneqarfik Sermersuumi nutaamik politikkikkut aqutsisoqalernissamik pisariaqartitsisoqarneranik Siorarsiorfimmi suliniut assersuutissatsialaavoq. Nutaamik borgmestereqalertariaqarpugut suleqatigiinnermik siuarsaasumik aamma suliniutinik annertuunik nutaanik iluamik qulakkeerinnissinnaasumik, Kim Kielsen allappoq, pisortat annertuumik akisussaaffeqartut aamma pisussaaffeqartut taanna isumaqarpoq, tamatumalu amerlasuunik apeqquteqartippaa.

Apeqquterpassuit
- Innuttaasut taakku 13.000-t nutaat suminngaanniissappat? Innuttaasut nutaat qanoq imminnut pilersussappat? Naak atorfiit tamakku pisariaqartinneqartussat? Illoqarfiup immikkoortuani nutaami ineqarnermut akiliutit qanoq amerlatigissappat? Inuit nalinginnaasut tassani ineqarnissaminnut akissaqassappat? Pisortat aningaasartuutinut qanoq tapiissuteqartigissappat? Suliniutip aningaasaqarneranut kommuni Namminersorlutik Oqartussallu qanoq qularnaveeqqusiitigissappat? Avataanit aningaasaliissutit qanoq amerlatigissappat?, Siumumi siulittaasoq aperivoq.

Aamma atuaruk: Illoqarfiup immikkortua nutaaq sullorsuarmik Nuummut atassuteqassaaq

Illoqarfiit ineriartortinneqarnissaannut suliniutinut pilersiaarutinik pisariaqartitsisoqartoq Kim Kielsenip naqissuserpaa, kisianni ''tamakku plakatini takussasiani kusanartuinnaallutik isumaannakkut pilersaarutaassanngitsut'' oqaatigaa.

Powered by Labrador CMS