20. 01. 2017
  • Dansk
  • Kalaallisut
Tuesday, January 10, 2017 - 18:11

Innuttaasut affaat Nuummi najugaqassapput

Nuummi takorluukkersaarutit annertoqaat, 2030-mili innuttaasut affaat najugaqassasut naatsorsuutigineqarpoq
Assi.: Leiff Josefsen
Kommuneqarfik Sermersuumi kommunalbestyrelse illoqarfiit pingaarnersaata allilernissaanut qaffasissupilussuarnik anguniagaqarnissamik pilersaarusiorpoq. Piviusunngortinneqassappata Kalaallit Nunaata assinga allanngorluinnarsinnaavoq

Najugaqariaaseq naalakkersuinikkut suliaavoq tamatigut kissatsissimaartumik oqaluuserineqartartoq. Maannakkullu nunatsinni kommunit inuttunersaat nukittunersaallu Sermersooq tamakkersornialerpoq.

Nuup allilernissaanut pilersaarutit Naalakkersuisut aappaagumut (2018-imut) aningaasanut inatsisissaanni sanaartornissamut kissaatini tigussaasumik sukumiisumillu takussaapput, taannalu Sanaartornermut avatangiisinullu Aqutsiveqarfiup kommunalbestyrelsimi ataatsimiititaliamut isummerfigineqartussatut nassiunneqaqqammerpoq.

Kommuneqarfik Sermersumi kommunalbestyrelsemip naatsorsuutigaa 2030-mi Nuuk minnerpaamik 30.000-inik inoqalersimassasoq. Allatut oqaatigalugu: Ullumikkut innuttaasut pingajorarterutaat ataallugu Nuummi najugaqarput (56.000-iniit 17-000-it) – ukiullu 13-it qaangiuppata Nuummi pilersaarutit malillugit innuttaasut affai sinnerlugit illoqarfiit pingaarnersaanni najugaqassapput.

Innuttaasussarpassuarnut nutaanut soorunami inissiat, meeqqeriviit atuarfiillu sananeqassapput.

- Pissutsit piviusut soorunami naleqqussarfigiinnarpavut. Ukiut tamaasa nunatta sinneraniit innuttaasut 500 aamma 800 akornanniittut Nuummut nuuttarput, nalilerparpullu taamatut ineriartorneq sukkatsissasoq, borgmesterip tullia siulleq Justus Hansen (D) oqarpoq.

Allaat immaqa 60.000-it
Justus Hansenip kommunalbestyrelsemi ilaasortaqatini peqatigalugit illoqarfiit pingaarnersaannut periusissiaq nutaaq akuersissutigai, »Nuuk – Issittumi illoqarfiit pingaarnersaat«, taannalu illoqarfiup ineriartorteqqinnerani tunngaviussaaq.

Periusissiami tassani innuttaasut 30.000-iunissaat takorluugaavoq. Periusissiap piorsarnerani ataatsimeersuarnermi »Arktisk Round Table« allaat illoqarfiit pingaarnersaanni innuttaasut 60.000-iusinnaanerat pineqarpoq; tassalu  ullumikkut Kalaallit Nunaanni innuttaasunit amerlanerullutik.

Nunatta Naatsorsueqqissaartarfiata siulittuinera malillugu ukiut 14-it qaangiuppata Nuummi innuttaasut 22.000-it ataatsilaarsimassavaat. Kommneqarfimmili Sermersuumi kommunalbestyrelse isumaqarpoq Issittumi illoqarfiit pingaarnersaanni innuttaasut amerlanerujussuit tunngavigineqarsinnaasut.

- Inuppassuit Nuummut nuukkusupput. Taamaattumiik Nuup sukkanerusumik allisinnaanissaa sulissutigisariaqarparput. Anguniarparput 2030-mi innuttaasut 30.000-iussatut, illoqarfiit pingaarnersaannut periusissiami toqqaannartumik erseqqissarneqarpoq.

Kalaallit Nunaanni Naatsorsueqqissaartarfiup taamatut isummerneq apeqquserpaa.

- Innuttasut amerlassusissaannik siumut siulittuigaangatta maannamut ineriartorneq tunngavisisarparput, naatsorsuutigalugu taamatut ingerlasoqaannassasoq, naatsorsueqqissaartarfimmi pisortaq Anders Blaabjerg innuttaasut amerlassusissaanik siulittuisarneq pillugu nassuiaavoq.

Illoqarfiup ilaanut nutaamut sullorsuaq
Sanaartugassatut takorluukkat allattorsimaffiat atuaqqissaaraanni  qularutissaanngilaq Kommuneqarfik Sermersuumi inuppassuit takkusuunnissaannut Illoqarfiit Pingaarnersaannut periusissami ilimagineqartumut eqqanaarsartoqalereersimasoq.

Qinngutsinni atuarfik nutaarluinnaq meeqqanut 1200-nut inissaqartoq, kiisalu aamma tassani atuarnerup kingorna ornittagaq naatsorsuutigineqarlutik. Tamatuma saniatigut meeqqerivinnut tallimanut nutaanut tamarmik 20 million koruuneqartunut aningaasaliinissamik siunnersuuteqarpoq. Sinerissamit nuukkusuttunut 12.000-nut naatsorsuutigineqarpoq meeqqat arfinillit ataallugit ukioqartut 824-iussasut.

- Meeqqeriviit amerlisariaqarput. Ullumikkut utaqqisoqareerpoq, kommunalbestyrelsemit Justus Hansen oqarpoq.

Ukiut sisamat qaangiuppata Nuummi illoqarfiit ilaat kingulleq Qinngorput tamakkiisumik sanaartorfigineqarsimassaaq. Alloriarnerup tullerissavaa Ukkusissat naqqani Siorarsiorfiup sanaartorfiginissaa. Tassunga ingerlanissaq eqqarsaatigineqalereersimavoq, taamaattumillu sullorsualiornissamut 400 million koruuninik qinnuteqarnissamut siunnersuuteqarpoq, imaluunniit sumiiffiup tungaanut sineriakkut aqquserniortoqarluni.

Periusissiaq malillugu  nuuttussarpassuit inissaqarnissaat kommunimit qulakkeerusunneqarpoq. Siullertullu inissiat nutaat 7.000-it sanaartornissaat pilersaarutaavoq. Siunissami kisitsit 15.000-inut qaffassaaq.

Borgmesterip Asii Chemnitz Narupip (IA) kissaatiginngilaa Nuummut anguniakkat sanaartugassatut kissaatinut pilertsaarummi takuneqarsinnaasut oqaaseqarfiginissaat, innersuuttigaluguli periusissiat aningaasanullu inatsisissami inaarutaasumik kissaatit kommunalbestyrelsep tulliani ataatsimiinnerata kingorna tusagassiuutinik katersortitsinermi saqqummiunneqarumaartut.

Kalaallit nunani allaniittut
Sanaartornermut avatangiisinullu aqutsiveqarfimmi pisortap Mike Jakob Kristiansenip aamma maluginiaqquaa kommunimit sanaartugassatut kissaatit saqqummiunnissaat maannakkut kissaatigineqanngitsoq, oqaluttuaraali aamma kalaallit Daqnmarkimiittut Nuummut nuukkusinnissaat pineqartoq aningaasaliinerit naammassineqarpata.

- Uterniarlutik kissaateqartunut aamma inissiaqarlunilu meeqqeriveqartariaqarpoq, pisortaq Mike Jakob Kristiansen oqarpoq.

Imaassanngila kommunimi illoqarfiit allat misigisimassallutik tunulliunneqarlutik, Nuummi taama annertutigisumik aningaasaliisoqassappat?

- Naagga, taakkumi utoqqarnut illutaassapput. Soorunami illoqarfinni nunaqarfinnilu allani kommunitsinniittuni ineriartortitsinissaq aamma eqqumaffigaarput, Mike Jakob Kristiansen iqarpoq.

Namminersorlutik Oqartussanut sanaartornissamut kissaatitut siunnersuutigineqarpoq Tasiilami 54 million koruunilimmik utoqqarnut illuliortoqassasoq Ittoqqortoormiinilu utoqqaat najugaqatigiiffiat allineqarluni. 

Allaaserisaq tamaat qisuariaatillu AG-mi uani sapaatip akunnerani saqqummertumi atuaruk. Aviisi uani aamma pisiarinissaanut periarfissaqarputit:

Seneste nyheder