nalimmassaanerup nutarternera
Siumukkormiu nalimmassaarinermut aaqqiisoqartinnagu paasissutissanik noqqaavoq
Siumut sinnerlugu Inatsisartuni ilaasortaq nalimmasaarinermut nutaamik aaqqissuussinissaq pillugu oqallinnermut ilannguppoq
Siumut sinnerlugu Inatsisartunut ilaasortaq Anders Olsen nalimmassaarinermut aqqissuusseqqinnissaq pillugu oqallinnermut akuliuppoq. Taassuma piumasaraa nammminersorlutik oqartussat suliffeqarfiutaanni sulisut akileraarutaannit Kommuneqarfik Sermersuup isertitai saqqummiunneqassasut.
Atuaruk: Asii: Vittus, ilisimasalittut oqalupputit
Nunamut namminermut aningaasaqarnermullu naalakkersuisoq Vittus Qujaukitsoq Simumeersoq kommunet akornanni nalimmassaarinermut nutaamik aaqqissuussinissamik suliniuteqarpoq. Tassani siunertaraa kommunet naligiinnerulernissaat tassungalu atatillugu 56 millioner koruunit Kommuneqarfik Sermersuumiit kommunenut allanut nuunnissaat siunnersuutigaa.
Atuaruk: Asii: Naalakkersuisut nunami kommuneni pitsuunersanngortinniarpaatigut
Siunnersuulli taama isikkoqartillugu Kommuneqarfik Sermersooq akerliulluinnarpoq aarleqqutigaallu 56 millioner koruunit kommunenut allanut nuunneqarpata Kommuneqarfik Sermersuumi sulisut 160-it soraarsitaasinnaasut.
Maannalu Anders Olsen Nanortalimmeersoq oqallinnermut ilanngunngorpoq paasissutissanillu saqqummiussisoqarnissaa piumasaralugu.
- Kommuneqarfik Sermersooq Namminersorlutik Oqartussat tamakkiisumik ilaannakortumilluunniit suliffeqarfiutaanit Kommuneqarfik Sermersuumi inissisimasuni, ukiuni tallimani kingullerni sulisut akileraarutaanit qanoq annertutigisumik isertitaqarpa?, Anders Olsen paragraf 37 naapertorlugu Naalakkersuisunut apeqquteqarpoq.
Qeqqata Kommunia qanoq isumaqarpa?
Kommuneqarfik Sermersuumi borgmesteri Asii Chemnitz Narup Inuit Ataqatigiinneersoq aamma Vittus Qujaukitsoq isumaqatigiinngitsupilussuupput nalimmassaarinermut Kommuneqarfik Sermersuup tunniuttagai annertunersut imaluunniit annikippallaarnersut pillugit.
2014-mi Kommuneqarfik Sermersooq 106 millioner koruuninik nalimmassaarinermut tunniussaqarpoq.
Saqqummiunneqartut malillugit nalimmassaarineq nutaaq akuersissutigineqassappat Qeqqata Kommunia 12 millioner koruuninik pissarsissasoq.
- Siunnersuutigineqartoq Qeqqata Kommuanit qanoq qisuariarfigineqarnersoq tusarneq ajoratsigu, paasersunnarpoq siunnersuutiugineqartoq Qeqqata Kommunianit qanoq isumaqarfigineqarnersoq Naalakkersuisunit ilisimaneqarnersoq, Anders Olsen oqarpoq.
Nalimmassaarinermut aaqqissuusseqqinnissaq suli akuersissutigineqanngilaq. Pilersaarutaavorli aggustip 11-at nallertinnagu isumaqatigiissusiortoqareersimassasoq.