Naligiissaarineq

Asii: Naalakkersuisut nunami kommunini piitsuunersanngortinniarpaatigut

Sermersuumi ilaqutariit SIK naapertorlugu aningaasarsiaqartut naligiissaarinermut ukiut tamaasa 12.000 koruuninik akiliisarput

Borgmester Asii Chemnitz Narup: – Uannut paasiuminaappoq Naalakersuisut kommuni illoqarfiit pingaarnersaata inissisimaffia nunami kommunini piitsuunersanngortinniarmassuk

Maannamut naligiissaarinermi najoqqutarineqartoq Kommuneqarfik Sermersuumik salliutitsinerarlugu isorineqartarpoq, kisianni kommuni illoqarfiit pingaarnersaannik inissisimaffigineqartoq ataatsimoorussanut kisiartaalluni ullumikkut pilliuteqartarpoq, kommuni tusagassiorfinnut nalunaarutikkut paasissutissiivoq.
Ullumikkut Kommuneqarfik Sermersooq 86,11 millioner koruuninik akileeqataasarpoq, imaluunnit akileraarutit 2,9 procentiata amerlaqataanik. Imaappoq, Paamiuni, Tasiilami, Ittoqqortoormiini Nuummilu ilaqutariit SIK-naapertorlugu aningaasarsiaqartut kommuninut allanut ukiumut 12.000 koruuninik akiliuteqartarput, tusagassiorfinnut nalunaarummi allassimavoq.
Piviusoq tamanna oqallinnermi isiginiarneqanngitsoorsimasoq, Kommuneqarfik Sermersuumi borgmesteri Asii Chemnitz Narup isumaqarpoq.
– Sermersooq nammaqataajumanngitsutut nittarsaanneqartarpoq, piviusorli tassaavoq, ukiut tamaasa millionerpassuarnik akileeqataasaratta, taanna oqarpoq.

100 procentit sinnerlugit
Naligiissaarinissamik iluarsartuusseqqinnissap oqallisigineqarnerani Sermersuumi ilaqutariit kommuninit allanit agguaqatigiissillugu isertitaqqortunerunerat eqqaaneqaqattaarpoq, kisiannili Kommuneqarfik Sermersuumi Aningaasaqarnermut pisortaagallartoq naapertorlugu, iluarsartuusseqqinnermi matumani assigiinngissut tamanna naligiissaarfigineqareerpoq.
– Kommunit ataasiakkaat aningaasatigut qanoq atugassaqarnerat qiviaraanni, ullumikkut nuna tamakkerlugu agguaqatigiissillugu procentit tallimat qaangerlugit inissisimasoqanngilaq, imaappoq, maannakkut naligiissaareriaaseq siunertaq naapertorlugu ingerlavoq, Lars Møller-Sørensen naliliivoq.

Nunami kommunit piitsuunersaat
Naligiissaarinermik iluarsartuusseqqinnissaq aggustip aqqarnani pilersaarutit naapertorlugit akuersissutigineqartussaq malillugu, Kommuneqarfik Sermersooq tassaalissaaq Nunatsinni kommunini innuttaasumut ataatsimut aningaasanik atugassakinnerpaaffiusoq. Imaappoq, 100 procentit sinnerlugit naligiissaarisoqareerpoq.
– Nunatsinni kommunip illoqarfiit pingaarnersaannik inississimaffiusup Naalakkersuisunit kommuninit piitsuunerpaaffinngortinniagaanera uannut paatsuunganartuuvoq, Asii Chemnitz Narup tusagassiorfinnut nalunaarutikkut oqarpoq.

Powered by Labrador CMS