Kommunini naligiissaarineq

Asii: Vittus, ilisimasalittut oqalupputit

Naligiissaarinermut tunngatillugu oqallinneq ingerlajuarsinnarpoq

Kommuneqarfik Sermersuumi Inuit Ataqatigiit kiisalu aningaasaqarnermut nunamullu namminermut naalakkersuisoq, Vittus Qujaukitsoq Siumumeersoq, qaammatini kingullerni naligiissaarineq pillugu annertuumik oqallittarput.

Naalakkersuisup Kommuneqarfik Sermersuumi kommunalbestyrelsimut ilaasortat isornartorsiorpai. Naalakkersuisut kommuninut agguaasarnerat allanngortinneqarnissaanut siunnersuuteqarput. Siunnersuut piviusunngortinneqassappat Kommuneqarfik Sermersooq eqqugaanerpaassaaq.

106 millionit ikigisassaanngitsut
Ataasinngormat Qanorooq aallakaatinneqarmat Aningaasaqarnermut Naalakkersuisoq, Vittus Qujaukitsoq oqarpoq, Sermersooq manna tikillugu naligiissaarinermut immikkut taasarialimmik akileeqataasimanngitsoq.

Tamanna Kommuneqarfik Sermersuumi borgmesterimit Asii Chemnitz Narupimit IA-meersumit isornartorsiorneqarpoq.

- Taamatut oqarneq tupinnarpoq, naligiissaarinissamik nutarterinissamut atatillugu pappiaqqaani atuarneqarsinnaammat, Sermersooq kommuninut allanut ukioq manna 106 millioninik akileeqataasussaasoq, tusagassiutinut nalunaarummi oqarpoq nangillunilu:

- Ullumikkut aningaasassaaleqivugut, kommunit kattutinnginneranni kommunit akiliisinnaajunnaaqqajaasut aningaasaqarnerisa qaffatsinnissaannut atornikuugatsigit. Tasiilami inissialiorpugut, aammalu Nuup avataani illoqarfinni nunaqarfinnilu sullissineq qaffatsissimallugu. Tassaavoq imminermi naligiissaarineq, kisiannili Naalakkersuisut nunatsinni kommunini piitsuunerpaanngortippatigut tamanna unitsinneqassaaq, Asii Chemnitz Narup oqarpoq kiisalu Vittus Qujaukitsup 'ilisimasalittut oqaaseqaataa eqqumiigaa'

Suliffeqarfiit 160-it
Kommunimi atorfeqartut 160-it sipaarniartoqartussaanera pissutigisaanik soraarsitsisoqartariaqassasoq kommunip naatsorsuuserisua Deloitte nalunaarpoq.

Kommuneqarfik Sermersuumi suliffissaaleqisut amerliartornerpaapput.

Kommuninut aningaasanik agguaasarnerup Naalakkersuisut siunnersuutaanni takuneqarsinnaavoq Kommuneqarfik Sermersooq ukiumut pisartagai 56 million koruuninik annikilleriassasut.

Naligiissaarinermut siunnersuut aggustip aqqarnganni atortussanngortinneqassaaq.

Powered by Labrador CMS