Aalisarneq
Saarullittasseeqqittoqarnera tunisassiorfinnut annertuumik pingaaruteqarpoq
Sinerissap qanittuani aalisarnermut saarullittassiissutit 8.000 tonsinik ilaqqinneqarnerat Royal Greenlandip tunisassiorfiutaani sulisut 300-nit amerlanerusut aalisartorpassuillu oktobarimi novembarimilu suliinnarsinnaanerannik aalisaannarsinnaanerannillu kinguneqassaaq
Saarullittassiissutit 8.000 tonsinik ilaqqinneqarnerat, Royal Greenlandimut annertuumik pingaaruteqarpoq.
Tassami tunisassiorfinni sulisut 300-t novembarip naanerata tungaanut sulisinnaanerannik kinguneqarpoq.
Atuaruk: Kinamiut 30-t tunisassiorfinni sulissapput
Illoqarfinnut pingaaruteqartoq
Saniatigut pisasseeqqinneq aningaasaqarnikkut, ingammik sulisunut aalisartunullu pingaaruteqartut, Royal Greenlandimi ingerlatsinermut pisortaq Sten Sørensen ilisimatitsivoq.
- Saniatigut pisassiissutigineqartut Qasigiannguani, Kangaatsiami, Sisimiuni Maniitsumilu saarulliit nerpiinik tunisassiorfinnut annermik pingaaruteqarput.
Nalitooq
- Tamannali nunaqarfinni tunitsivinni amerlasuuni saarullinnik tarajortikkanik nunaqarfinnilu tunitsiviit ilaanni saarullinnik issittumi panertitanik ataavartumik tunisassiorsinnaanitsinnik minnerunngitsumillu saarullinnik qerinasuartitassanik illoqarfinni nunaqarfinnilu allani tunitsivinnut aamma ataavartumik tunisisoqarsinnaanissaanik kinguneqassaaq, Sten Sørensen, oqarpoq.
Tassa imaappoq, saniatigut pisassiisoqarnera Royal Greenlandimut kisianni annertunerusumik sulisut aalisartullu aningaasaqarniarnerannut pingaaruteqarpoq, Sten Sørensen, RG.gl-imut oqarpoq.
Suliffeqarfiup ilisimatitsissutigaa, saniatigut saarullittassiissutit 6000 tonsiusut Royal Greenlandip pilersuisuinut tassa aalisartunut 25-30 millionit missaannik naleqartut.
Atuaruk: Kangaatsiami aalisakkanik tunisassiorneq ingerlaqqilertoq