Kangaatsiami aalisakkanik tunisassiorneq ingerlaqqilertoq

Ukioq manna saarullinnik tunisassiornerup aallartiaarnera Kangaatsiamilu imissaaleqisoqannginnera pissutigalugit Kangaatsiami Royal Greenlandip tunisassiorfiani aalakkaasumik tunisassiorput.

Naak tunisassiorfimmi ilaatigut sulisussaaleqineq ajornartorsiutaasaraluartoq tunisassiorfik maanna siornarniit tunisassiorneruvoq.

Atuaruk: Saarulliit suliffinnik pilersitsipput

Ajornartorsiutit iluarsineqartut
- Naak sulisut holdit ataasiinnaat manna sulisorigalualuarlutigik 2015-imi ukioq tamaat tunisassiarisatsinniit ukioq manna tunisassiavut annertunerupput, Kangaatsiami Royal Greenlandip tunisassiorfiani ingerlatsisoq Abia Thorsteinsen oqarpoq.

Kangaatsiami imissaaleqineq pissutigalugu Royal Greenlandip tunisassiorfiani saarulliit nerpiinik tunisassiorneq 2015-imi oktoberimi unitsinneqarpoq taamaallaalli saarullinnik qeritanik tunisassiorneq ingerlanneqalerluni.

Imissaqarniarnikkut ajornartorsiut Nukissiorfinniit aaqqiivigineqarmat, Abia Thorsteinsenip neriuutigaa, ukioq naallugu aalakkaasumik tunisassiorsinnaajumaarlutik.

Atuaruk: Aalisakkanik suliffissuaq tunisinermut ammaqqissaaq

Tunisassiorneq
Kangaatsiami tunisassiorfimmi mannakkorpiaq inuit 45-it 50-illu akornanni sulisorineqarput. Taakkunannga inuit 35-it missingi saarullinnik tisallutik qeritanillu suliaqarput.

- Sulisut sulinngitsoortarnerat unammillernarsimavoq – aamma ukioq manna sulisut ullukkoortut kisiisa sulisorigaluarlutigik. Tunisassiornitsinni malinnaasinnaagaluarpugut, kisianni sulisut sulinngitsoortarnerat aporfigisanngitsuugutsigu ukioq manna annertunerusunik tunisassiorsimasinnaagaluarpugut, tunisassiorfimmi pisortaq oqarpoq.

Kangaatsiami Royal Greenlandip tunisassiorfiani siornatigut aalisakkanik qerititanik tunisassiorsimagaluartut 2015-imi maajimi aalisakkanik tisaanik tunisassiulerput.

Kangaatsiaami inuit 550-it najugaqarput, taakkunannga sulisinnaasut 348-iupput.

Atuaruk: Sumiiffinni arlalinni aalisakkanik tunisassiorneq annertusivoq