Kinamiut 30-t tunisassiorfinni sulissapput

Nunatsinni suliffeqarfiit annersaat, Royal Greenland, nunami tunisassiorfinni sulisussaaleqinermik ajornartorsiuteqartuarneq pissutigalugu, nunanit allaneersunit sulisussarsiortariaqarpoq.

Taamaammat suliffeqarfissuaq sulisunik Kinamit tikisitsilerpoq. Pilersaarutit malillugit Kinamit suliartortut 30-t siulliit upernaaru Kalaallit Nunaannut tikissapput.

Atuaruk: Suliffissuaq sulisunik aalajaatsunik amigaateqartoq

Amerlineqarsinnaasut
Royal Greenlandip Maniitsumi, Uummannami aamma Qasigiannguani tunisassiorfiini taakku sulissapput.

- Sulisut Kinameersut immaqalu nunanit allaneersut 2017-imi aasap ingerlanerani – aammalumi ukiut tulliuttut ingerlaneranni - amerlineqarnissaat siunertaavoq, Royal Greenlandip suliffeqarfissuarmi sulisoqarnermi ingerlatsisua Søren Olsen Damgaard RG.gl-mut oqarpoq.

Sulisunik amerlanerusunik pisariaqartitsisut
Ingammik ulapaarfiusup nalaani suliffeqarfik sulisussaaleqisartoq, Søren Olsen Damgaard nassuiaavoq.

- Tunisassiorfinni sulisut aalajaatsut pikkorissullu aamma suliffeqarfik sinnerlugu sulilluartut amerlagaluartut sulisunik amerlanerusunik pisarisaqartitsivugut. Sulisussaaleqisarnerput qaangerusullutigu sineriammit ukiuni arlaqartuni iluatsilluartartumik suliartortitsisarsimavugut, sulisussaaleqisarnerpulli ukiumiit ukiumut annertusiartuinnartarsimammat sulisussaaleqisarnerput ajoraluartumik qaangivinneq ajorparput, taanna erseqqissaavoq.

Atuaruk: Nunassittartut ilinniarsimanngitsut amerliartuinnarput

Nunatsinniiginnassasut
Nunanit allaneersut suliartortut nuullutik Nunatsinniiginnarnissaat Royal Greenlandip siunertaraa.

- Akissaatinut tunngatillugu sulilertussat tunisassiorfiutitsinni sulisut allatuulli assigiinnik periarfissaqartitaassapput, Royal Greenlandimi sulisoqarnermut pisortaq, Søren Olsen Damgaard oqarpoq.

Sulilertussat angalanissaat ineqartitaanissaallu pillugit isumagisassat Royal Greenlandimit isumagineqassapput.