inuutissarsiorneq
Royal Greenlandip naatsorsuutit aatsaat taama angusarissaartigisut saqqummiuppai
Akileraannginnermi 335 millionit koruuninik angusaqarluni Royal Greenland siorna naatsorsuutit qaangerluit aatsaat taama angusarissaartigaaq. Naak aamma naatsorsuutini qaammatit pingasunik saniatigut ilanngussisimagaluarlutik
Kalaallit suliffeqarfissuat Royal Greenland ingerlalluarpoq.
Pingasunngornermi ullaap tungaani ukiumut naatsorsuiffiusumi 2016-imi akileraannginnermi 335 millionit koruuninik sinneqartooruteqarnermik saqqummiussipput.
Atuaruk: Royal Greenlandip namminersortunngorsarneqarnissaa SIK-mit isumaqataaffigineqanngilaq
- Sinneqartoorut nuannaarutigisorujussuuarput. Minnerpaamillu tamanna marlunnik pissuteqarpoq. Siullermik ukiup arfinilissaannik siuariarnitsinnik pissuteqarpoq, Mikael Thinghuus, Royal Greenland pisortaaneq oqarpoq.
Pisinerit tunisinerillu pitsaasut
Pissutaasup aappaa tassaavoq, Royal Greenlandip siorna suliffeqarfinnik tulluanngitsunik tunisisimanera. Tulluartunillu nassaarsimalluni.
Atuaruk: Royal Greenland Uummannami sulisussaaleqisoq
- Ukiut pingasut matuma siorna suliffeqarfissuaq Tysklandimiittoq tunivarput, kalaallit nerisassiornerannut tunngassuteqavinnginnera pissutigalugu, Mikael Thinghuus oqarpoq.
Canadamiut Quin-Sea Fisheries Ltd. Newfoundlandimiittoq pisiarinerani sinneqartooruteqarnermut pissutaasut ilagaat, taanna Royal Greenlandip ukiut marluk matuma siorna tiguaa.
Atuaruk: Thinghuus canadamiunut eqqissisaavoq: Uagut pitsaanerpaavugut
- Qanoq annertutigisumik sunniuteqarsimanersut oqaatigiuminaapput, suliffeqarfimmut peqataallualereernerat pissutigalugu. Kisianni immaqa siorna siuariarnerup affaata missaanut malunniuteqarsimapput, pisortaq oqarpoq.
Ukioq ataaseq 15-nik qaammatilik
Ukioq naatsorsuiffiusoq 2015/2016-imut saqqummiunneqaqqammersoq, qaammatini 15-ini naatsorsuiffiunera oqaatigineqartariaqarpoq. Royal Greenlandip maannamut ukiumut naatsorsuutit oktobarimit oktobarimut ingerlaavartumik saqqummiuttarsimammagit. Maanna januaarip aallaqqaataanit decembarip naaneranut naatsorsuisalerniarput. Taammaammallu qaammatit taakku pingasut naatsorsuinermut ilanngunneqarsimapput.
Tamannali aatsaat taama angusarissaartiginermut sunniuteqanngilaq. Taakku 335 millionit ukiumut kaaviaartitanut naatsorsoraanni, akileraannginnermi 267 millionit missaanniipput, tamannalu suli aatsaat taama pitsaatigaaq.