Aalisarneq
Royal Greenland Uummannami sulisussaaleqisoq
Uummannami Royal Greenland annertuumik nutarterneqareerluni marsip naalernerani ammaqqippoq. Taamaakkaluartoq suliffeqarfik sulisussaaleqivoq.
Royal Greenlandip nittartagaa malillugu tunisassiorfiup qaammatini quligiluani matoqqareerluni ammaqqinneqarnerani aalisartunit nuannaarutigineqarpoq.
Sulisussaaleqisoq
- Ammarnitsinniilli sulisussaqarniarneq unammillernartipparput. Ammaqqaratta qalerallit niaquerlugit paperulerlugillu tunisassiaraavut, kisianni sapaatiummalli qalerallit ilivitsuutiinnarlugit qeriterpavut. Sulisut pingasut nunaqarfimmeersut sulilersinnerisigut suleqatittalu ilaasa pikkorissarnissaasa taamaatinneratigut sulisussaaleqineq iluarsiiviginiarsimavarput. Pingasunngornermiit qaleralinnik niaquikkanik paperuiakkanillu tunisassiorneq aallarteqqissaaq, kisiannili nerpiliorluta tunisassiulissagutta tunisassiorfimmi sulisunik amerlanerusunik atorfissaqartitsivugut, Uummannami Royal Greenlandip tunisassiorfiani ingerlatsisoq Kirsten Nielsen Jensen oqarpoq.
Uummannami aalisartut Royal Greenlandip tunisassiorfianut tunisisartut tunisassiorfiup nutarterneqarlunilu allilerneqarnerata nalaani umiarsuarnut tunitsiviusunut assigiinngitsunut marlunnut tunisisarput, umiarsuup aappaa - sikunnginnerani – Uummannap eqqaani immamiippoq.
Holdit marluk paarlakaallutik sulisut
Sikoreernerata kingorna aalisartut umiarsuarmut tunitsivimmut tunisassiorfiup eqqaaniittumut tunisisarput. Tassani Royal Greenlandip tunisassiorfiani sulisut 16-it tunisassiorfiup nutarterneqareerluni sapaatip-akunnera kingulleq tunisassioqqilernissaata tungaanut paarlakaattut marlunngorlutik sulipput.