piteqqap kinguneri
Piteqqamut eqqugaasut pillugit akissutissarserusuttoq
Inuit Ataqatigiinni siulittaasoq Sara Olsvig, piteraq pillugu Inatsisartuni suliamik qaqitsivoq
Tunumi innuttaasut illuminnik imaluunniit umiatsiaminnik kingullermi piterarnerani aserorneqartunik qanoq ikiorneqassappat?
Tassungalu atatillugu Naalakkersuisut qanoq iliuuseqarpat?
Atuaruk: Partiinit illuatungeriinnit kaammattuut: Piteqqamit eqqugaasut ikiorsigit
IA-p siulittaasuanit Sara Olsvigimit paragraf 37 naapertorlugu Naalakkersuisunut apeqqutit arlaqartut ilaat taama nipeqarput.
Piteraq sakkortooq
Tunumi ataasinngornerup unnuaani novemberip 23-ni piteralermat ualip tungaanut anorersuarpoq, tamannalu aallaavigalugu apeqquteqartoqarpoq. Tassanilu aamma anoraasuarnerit sekundimut 70 meterisut sakkiortussuseqartut uuttortarneqarput. Tamanna tiimimut 252 kilometerinik sukkassuseqarpoq. Illullu qaliai teqqaapput, umiatsiallu nunamiittut assakaatinneqarlutik.
Atuaruk: Tasiilami anorersuarmik eqqugaasunut attaveqaammik pilersitsisoqarpoq
Inunnut sunniuteqartartoq
- Nalunngilarput taama sakkortutigisumik anorersuartillugu inunnut sakkortuumik aamma sunniuteqartartoq paaserusupparpullu piterarnerup nalaani kingornalu innuttaasut naammattumik saaffissaqarsimanersut. Aamma paaserusupparput illunik angallatinillu aserortoorsimasut sillimmaserneqarnikkut ajornartorsiuteqarsimagunik pisortanit naammattumik ikiorserneqarsinnaanissaminnut periarfissaqarnersut, Sara Olsvig apeqquternermini allappoq.
Assit takukkit: Tasiilami piteraq sakkortooq