Tasiilaq
Tasiilami anorersuarmik eqqugaasunut attaveqaammik pilersitsisoqarpoq
Kommuneqarfik Sermersuup Tunumi piteraq qanimut malittaraa
Tasiilami maannakkut piteraq sakkortoorujussuaq Nuummi Kommuneqarfiup Allafianit qanimut malinnaaffigineqarpoq. Tasiilami anori suli sakkortoorujussuummat silamiinnissaq isumannaatsuunngilaq aamma Piteqqap innarliinerinik misissuilluni sulinerit ajornakusoornarsisippai.
Assit takukkit: Tasiilami piteraq sakkortooq
Pilersaarusiortut
- Anorlerunnaariarpat innarliinerit naatsorsorlugit aallartissaagut aammalu iluarsaassinissanut piaartumillu iluarsiinissanut pilersaarusiussalluta, Kommuneqarfik Sermersuumi pisortaaneq, Steffen Ulrich-Lynge oqarpoq.
Ilisimaneqartutut entreprenøritut suliffeqarfiit Tasiilami anginersaasoq Viking Greenland qanittukkut akiliisinnaajunnaarpoq. Tamatuma anorersuup innarligaanik iluarsaassiniarneq ajornakusoortissavaa.
Atuaruk: Akiliisinnaajunnaartumit Tasiilami 30-t soraarsitaapput
- Sanarfinermut Avatangiisinullu Ingerlatsivitsinni aaqqiissutissanik ujartuillutik ulapputtorsuupput, taamaalillutik suliassat ingerlaannaq aallartinneqarsinnaaniassammata. Ajornartorsiummik ilungersunartumik aaqqiissutissamik nassaartariaqarpugut, Steffen Ulrich-Lynge oqarpoq.
Attaveqarfissaq
Tasiilami innuttaasunut Piterarnerani ajornartorsiuteqartunut Sanarfinermut Avatangiisinullu Ingerlatsivimmiut attaviliisimapput.
Ingerlatsineq pillugu apeqqutinut tunngasut. Tamakku assersuutigalugu tassaasinnaapput aqquserngit asserneqarsimasut, taava uunga sianertoqassaaq: 36 77 21.
Illut innarlerneqarsimasut pillugit uunga sianertoqassaaq: 48 57 28.
Oqarasuaatinut taakkununnga sianertut nalunaaquttap 08.00-ip aamma 16.00-ip akornanni akineqartassapput, kommuni ilisimatitsivoq.