Tasiilaq

Partiinit illuatungeriinnit kaammattuut: Piteqqamit eqqugaasut ikiorsigit

Inatsisartuni ilaasortat Laura Tàunâjik (S) aamma Iddimanngiiu Bianco (IA), Naalakkersuisunut kajumissaarummik kaammattuipput

Ataasinngornerup unnuaani novemberip 23-ni piteqqap kingulliup Tasiilaq sakkortuumik eqqorpaa

Illup qaliai teqqaatinneqarput, igalaat qaartiterput, angallateeqqat nunamiittut tingitaapput uppikaatinneqarlutik. Ilaqutariippassuit uippalleqqapput angerlarsimaffinnik inigineqarsinnaanngitsunik inigisaqalerlutik, anorersuallu aserugaannik iluarsartuussinissanut pisarialinnut akissaqaratik.

Taamaattumik Naalakkersuisut sassartariaqarput, Tasiilamilu innuttaasut ikiorlugit, Inatsisartuni partiit illuatungeriit taama kaammattuuteqarput.

Ataasinngornerup unnuaani novemberip 23-ni piteraq takkuppoq, akunnernillu arlalinni anorersuarluni Tasiilaq annertuumik eqqorlugu.

Assit takukkit: Tasiilami piteraq sakkortooq

Sakkortoorujussuaq
- Piteraq Tasiilami innuttaasut sungiusimavaat, taamaakkaluartoq piteraq kingulleq sakkortoorujussuulluni takkummat illoqarfimmi annertuumik aseruivoq. Ilaqutariit ikiorasuarneqarnissamik pisariaqartitsipput, politikerit marluk erseqqissaapput.

Atuaruk: Tasiilami anorersuarmik eqqugaasunut attaveqaammik pilersitsisoqarpoq

Ikiuisarneq ileqquusoq
- Nunanut allanut ajunaarnermik eqqugaasunut ikiuisarneq ileqqoraarput, tamanna pillugu tulluussimaarutissaqarpugut, Laura Tàunâjik aamma Iddimanngiiu Bianco uparuaapput.

Atuaruk: Akiliisinnaajunnaartumit Tasiilami 30-t soraarsitaapput

Annertuumik eqqorneqartut
- Taamaakkaluartoq ajunaarnersuit nunani allani kisimi pineq ajorput. Tamanna aamma Kalaallit Nunaata kujataani nunalerinermik suliallit panernermik eqqugaammata takuarput. Taamaalisoqarneratigut Naalakkersuisut savaatilinnut nunalerinermillu sulialinnut ikiorsiipput. Maanna Tasiilami innuttaasut ikiorasuarneqarnissaminnik pisariaqartitsipput, politikerit ilanngullugu taama oqarput.

Powered by Labrador CMS