Steen Lynge: Maliina, qissaarnaannarpoq
Aningaasaqarnermut politikkimut akisussaasoq Maliina Abelsen IA-eersoq aatsitassat piiarnissaannut 'meerarpaluttumik isiginnittaaseqarpoq', Atassummiit Steen Lynge isornartorsiuivoq
Sisamanngormat Forsvarsakademimi pisortaq kontreadmiral Nils Wang oqarpoq namminersorneq pillugu inatsit kukkuneqartoq. Taannalu atuutilissaaq aatsitassat tunineqarneranni Danmarkimut nunanut allanut tunngasutigut, isumannaallisaanikkut illersornissamullu tunngatillugu akornutaalerpat.
Nuummi Katuami ataatsimeersuarnermi 'Future Greenlandimi' isuma taamaattoq uissuumminartoq saqqummiunneqarpoq.
Nils Wang saqqummeereermat aningaasaqarnermut naalakkersuisoq Maliina Abelsen Inuit Ataqatigiinneersoq oqaaseqarpoq.
- Ulluni makkunani Danmarkimi naalakkersuinermik suliallit ilaat ataqqinninngillat. Siunnersuisoqatigiinnik taamaattunik (arlaannaannulluunniit attuumassuteqanngitsut, Foreign investment review boardimik taaneqartartut, aaqq.) pilersitsigutta imatut pisoqariaannaavoq Danmark immaqa tassanngaannaq nunatsinni aningaasaliissutaasunik tamanik misissuinialerluni, Maliina Abelsen oqarpoq Hans Lyngellu inersuaani ataatsimeersuartunit ersaattaanneqarluni.
Læs "Maliina fik luft for frustration"
Læs "Dask til dansk råstof-slingrekurs"
Læs "Fejl i selvstyrelov spænder ben for råstofsalg"
Oqaasiili Atassut sinnerlugu Inatsisartunut qineqqusaartumit Steen Lyngemit allatut ilassineqarput:
- Maliina Abelsenip qisuariarnera ajoraluartumik naalakkersuisut aatsitassaatitta piiaarnissaannut meerarpaluttunik pissuseqarnerannut takussutissaavoq, suliniutit angisuut pilersinniarneranni sanaartornerup nalaani nunanit allamiorpassuit ingammik nunamit inuit pisinnaatitaaffiinik ataqqinniffiunngitsumit aggerfeqartut takkussuunnissaanut atatillugu.
- Imaassinnaavoq Kinamiorpassuit Isukasianut tikikkunik qimaasutut isigineqarusulersut. Kinamiillu inuit taakku Kinamut utertinneqarnissaannik piumasaqarpata Danmark qanoq iliuuseqarsinnaava, nunat akornanni isumaqatigiissutit qanoq innersut apeqqutaatinnagu, Steen Lynge aperaaq isumaqarlunilu Kinamiit nunarput taamaalillunilu Danmark pinngitsaalineqarsinnaasoq isumaqatigiissutit taakku akerlerisaannik qimaasut Kinamiunit aaneqarlutik.
Akerliuneq iluaqutaanngilaq
- Naalakkersuisut taamatut pisoqarsinnaanera eqqarsaatigisimavaat? Tassani naalagaaffik qimaasunit taakkuninnga tigusisussaavoq, Kinalli Danmark ajornanngitsumik pinngitsaalisinnaavaa isumaqatigiissutit unioqqutillugit Kinamut tunniusseqqullugu.
- Taamaattumik Nils Wang eqqorpoq oqarami taamaattunik kinguneqarsinnaanera pilllugu siunnersuisoqatigiinnik pilersitsisoqartariaqartoq, pilersaarusiorluartoqarsinnaaniassammat. Allatut iliorneq meerarpaluttuuvoq akerliuniarnerillu suulluunniit akisussaassuseqaratik. Uani oqallinnermi pinerliigivineqartutut pissusilersortoqartariaqanngilaq. Tamanna tamatsinnut toqqaannartumik ajoqutaassaaq, Steen Lynge Sermitsiaq.AG-mut oqarpoq.
Sermitsiaq.AG-mi ’Future Greenland 2013’ pillugu allaaserisat tamaasa atuakkit uani