Ombudsmandi
Naammagittaalliuutit amerlanerulernerat nutaarsiassatsialaavoq
Ombudsmandip nunaqarfinnut tikeraarnermini innuttaasut naammagittaalliuuteqarnissamut pitsaanerusumik ilisimasaqalersippai
Naammagittaalliuutit amerlanerusut. Ombudsmandip siorna aasaq Avannaanut angalanerata tamanna inerneraa.
Naammagittaalliuutillu amerlinerat pitsaasumik takussutissiivoq, ombudsmandeqarfik nalunaarutimini naliliivoq. Tamannami innuttaasut pisinnaatitaaffimminnut eqqumaffiginninnerulernerannik takussutissaavoq.
Atuaruk: Vera Leth ombudsmanditut toqqagaaqqippoq
Najugaqarfiit 19-it tikeraarneqartut
Ombudsmandeqarfik Avannaani 2015-imi ataatsimut paasisitsiniaanermi Sulisilluni Ajoquserneq pillugu Sullissiviup, Suliffinnik Nakkutilliisoqarfiup, Inatsisitigut Siunnersuisarfiup IKIU-p aamma Meeqqat Pisinnaatitaaffii pillugit Sullissiviup MIO-p peqataaffigisaanni ilaanissaminut periarfissinneqarpo. Tassani Qaasuitsup Kommuniani nunaqarfiit 17-it aamma illoqarfiit marluk tikinneqarput.
Atuaruk: Qaasuitsup Kommuniani meeqqat atugaat salliutinneqassapput
Ineqarneq, aalisarsinnaanermut akuersissutit aamma akineqannginnerit
Sumiiffinni tamani innuttaasut assigiinngitsut pillugit saaffiginnissinnaapput ilitsersorneqarlutillu. Inuit katillugit 45-t periarfissartik atorlugu, inissianik attartorneq, aningaasatigut ikiorserneqarnermut, aalisarsinnaanermut akuersissutinik itigartitsinermut aamma oqartussat saaffiginnissutinut akissuteqanngitsut pillugit apeqquteqarput.
Atuaruk: Ombudsmand: Aalisagartassat akuersissutillu kukkuneqarsimapput
Peqqissaarpallaamik oqaaseqarneq
Innuttaasut amerlasuut malaarutinut immersugassat immersornissaanut ikiorneqarnissamik pisariaqartitsisartut paasinarsivoq, kiisalu ombudsmandip paasissutissat suut pisariaqartinnerai nassuiaanneqarnissamik pisarisaqartitsisartut. Taamatullu oqartussat oqaatsit atugaat paasinissaat ajornarsinnaasarsimalluni.
- Inuit oqartussaasunut allanniarnertik ajornakusoortorsiutigisinnaasaraat oqartussaasunilluunniit allagarsiatik paasiuminaatsittaraat taamaattumillu Ombudsmandimut naammagittaalliorniarneq aamma ajornakusoortinneqartartoq malunnarpoq, ombudmandi nalunaarummini allappoq.
Atuaruk: Ombudsmandip kukkusumik suliaqarsimaneq unitsippaa
Angalanerup kingorna naammagittaalliuutit amerlanerusut
Innuttaasut 45-uusut ilaasa maalaarutitik tassani tunniussinnaasimavaat, ilaallu paasissutissanik amerlanerusunik pissarsiniartariaqarsimapput imaluunniit sullissivinnut allanut angalaqataasunut saaffiginnissuteqartinneqarput.
Quppersagaaqqat ombudsmandimut qanoq naammagittaalliuteqartoqarsinnaaneranik nassuiaatillit aamma ilineqarput. Ataatsimut isigalugu ombudsmandeqarfik angalaareernerup kingorna maalaarutinik amerlanerusunik pissarsineranik kinguneqarpoq.
Nunaqarfinnilu innuttaasut pisinnaatitaaffitik eqqumaffigilernerusimammatigit, tamanna ombudsmandip ingammik nuannaarutigaa.
- Ombudsmandeqarfiup angalanerata naammagittaalliuutit amerleriarnissaat soorunalimi imminni siunertarinngilaa, naammagittaalliuutilli amerleriarnerat Ombudsmandimut naammagittaalliornissamut periarfissap inunnik ataasiakkaanik naapitsinikkut paasissutissatigullu agguaanneqartutigut ilisimaneqarnerulersimaneranut takussutissaagunarnera naammagisimaarnarpoq, nalunaarummi tamanna allaqqavoq.
Nunaqarfinni innuttaasut ataatsimut isigalugu, naak kisitsisinik takussutissartaqanngikkaluartoq naammagittaalliunnginnerusartut, ombudsmandeqarfiup nalilerpaa.
Ombudsmandip nalunaarutaa ullumi Inatsisartuni suliarineqassaaq.