Isornartorsiorneqaqqipput

Ombudsmand: Aalisagartassat akuersissutillu kukkuneqarsimapput

Qaleralinniarnermi aalisarsinnaanermut akuersissutinik pisassanillu agguaassisimaneq Inatsisartut ombudsmandiata isornartorsiorpaa

Inatsisartut ombudsmandiat Vera Leth naliliivoq qaleralinniarsinnaanermut akuersissutit pisassiissutillu arlallit suliarineranni kukkusoqarsimasoq

Qaleralinniarnermi aalisarsinnaanermut akuersissutinik pisassanillu agguaassisimaneq ombudsmandip nammineq aallartitaminik misissorpaa. Suliarinninnermi malittarisassat tunngaviusut suliani arlalinni malinneqarsimanngitsut, ombudsmandi inerniliinermini allappoq.

Inatsisartut ombudsmandiat Vera Leth 2012mi decemberimi qaleralinniarsinnaanermi akuersissutit pisassallu agguaanneqarsimanerat pillugu misissuinermik aallartitsivoq. Misissuineq aallartippaa aalisartut arlallit maalaarutaat tigoreerlugit. Suliani arlalinni kukkusoqarsimasoq ombudsmandip misissuinermit nalunaarusiaani tallimanngornermi saqqummiunneqartumi erserpoq.

Ombudsmandip aamma apeqquserpaa aalisarnermut, piniarnermut nunalerinermullu naalakkersuisoqarfiup suleriaasiisa ilaat inatsisitigut tunngavissaqarnersoq.

Pisassat ikinaakkat
Tassani pineqarpoq aalisarsinnaanermut akuersissutinik pissarsisinnaasut taamaallaat tassaatinneqarmat ukiumi siuliani aalisarsinnaanermut akuersissummik peqarsimasut. Tamanna inatsitigut tunngavissaqarnersoq ombudsmandip qularaa.

Aalisartut arlallit aamma maalaarutigisimavaat pisassanik qinnuteqaammik itigartinneqarnertik. Aamma allat maalaarutigisimavaat pisassamik ilimagisamit ikinnerungaatsiarnerat.

Ombudsmandip isornartorsiorpaa aalajangiinnerni arlalinni amigartumik tunngavissaqartoqarsimanera.

- Tamanna tunngavigalugu qularaara naalakkersuisoqarfiup aalajangernermut tunngavissatut paasissutissat pisariaqartut tamakkerlugit pissarsiarisimassagai suliani misissorneqartuni, ombudsmand Vera Leth nalunaarusiamini allappoq.

Taassuma ilanngullugu uparuarpaa aalajangiinnerni arlalinni illuatungiusut tusarniaaffigineqarsimannginnerat inatsisit tunngavialugit tamanna pisariaqarsimagaluartoq nalileramiuk

- Illuatungiusoq suliaq pillugu paasitinneqarsimanngikkuni soorunami paasisinnaanngilaa suliami suut tunngavigineqarsimanersut, ombudsmandi allappoq.

Taanna isumaqarpoq aalisartut ilimagisamit annikinnerusunik pisassinneqartut aalajangiiniarnermi tusarniaavigineqarsimasussaagaluartut

Isornartorsiuinerit ombudsmandip aalisarnermut, piniarnermut nunalerinermullu naalakkersuisoqarfimmut saqqummiutereerpaa, isornartorsiuinerlu tassani tusaatissatut tiguneqarpoq.

Ombudsmandip nalunaarutaa tamaat linkimi talerpiatungaani aasinnaavat

Powered by Labrador CMS