meeqqat inuusuttullu
Qaasuitsup Kommuniani meeqqat atugaat salliutinneqassapput
Avannaani kommuunimi pissutsinut sakkortuumik isornartorsiusoqareersoq, suliamut attuumassuteqartut arlallit meeqqat illersuisuat naapippaat
Qaasuitsup Kommuniani kommunalbestyrelsimut ilaasortat aamma meeqqat illersuisuat, Aviâja Egede Lynge, ulloq 23. oktober meeqqanut atugassarititaasut pillugit ataatsimeeqatigiipput.
Meeqqat Illersuisuata aggustimi Qaasuitsup Kommuniani illoqarfinnut marlunnut nunaqarfinnullu 16-inut tikeraareernerata kingorna malitseqartitsinikkut tamanna pivoq.
Atuaruk: Qaasuitsup Kommuniata meeqqat pisinnaatitaaffii unioqqutippai
Aviâja Egede Lyngep angalanermi takusat pillugit kommunalbestyrelsi kiisalu Naalagaaffiit Peqatigiit Meeqqat Pisinnaatitaaffii pillugit Isumaqatigiissutaa tunngavigalugu isornartorsiuinini tunngavilersorpaa.
Iliuuseqarneq nuannaarutigigaa
- Tamanna tunngavigalugu kommunalbestyrelsi pitsaasumik siunertaqarluartumillu ataatsimeeqatigaarput nuannaarutigaaralu, kommunalbestyrelsip aalajangersimammagu, meeqqanut tunngasut 2016-imi annertunerusumik salliutinneqarnissaat meeqqat illersuisuat tusagassiuutinut nalunaarummi allappoq.
Kommuuni meeqqanut inuusuttunullu politikkeqalersimanera taassuma nuannaarutigaa.
Naalakkersuisut akisussaaqataasut
Qaasuitsup Kommuniata kommunalbestyrelsia ataatsimeeqatigiinnermi meeqqat illersuisuata septemberimi isornartorsiutaanik itisiliiffigineqarnissaminut periarfissinneqarpoq.
Ataatsimiinnermi aamma meeqqat Qaasuitsumi sumiginnarneqartarnerat kommuunip kisimi akisussaaffiginngikkaa.
- Meeqqat sumiginnarneqartarnerannik ajornartorsiut angisoorujussuummat ajornartorsiutip iliuuseqarfiginissaanut pisortani sulisinnaasut tamarmik iliuuseqarnikkut nukittorsaaqataanissaat pisariaqarpoq, borgmesteri Ole Dorph (S) oqarpoq.
Atuaruk: Kommunit meeqqanut inuusuttuaqqanullu sumiginnaanerannut ataatsimiisitaliaq annilaartoq
Qaasuitsup Kommuniata aamma Aviâja Egede Lyngep suleqatigiinnertik aallarnerlugu meeqqat atugaat pillugit Inunnik Isumaginninnermut Ataatsimiititaliami siulittaasoq Kristian Jeremiassen aamma inunnik isumaginninnermut pisortaq Henrik Sóloy ulloq 2. november 2015 ataatsimeeqatigissavaat.
Atuaruk: Isornartorsiuineq IA-mi ilaasortamit oqaaseqarfigiumaneqanngitsoq