Meeqqat atugaat
Isornartorsiuineq IA-mi ilaasortamit oqaaseqarfigiumaneqanngitsoq
Meeqqanut illersuisup Qaasuitsup Kommuniata FN-ip meeqqanut isumaqatigiissutaanik unioqqutitsisimanerarlugu isornartorsiuinera Qaasuitsup Kommuniani IA-mi ilaasortamit tusagassiuutit aqqutigalugit oqaaseqarusunngilaq. Oqaloqatigiittoqarnissaali siunnersuutigaa
Qaasuitsup Kommuniani FN-ip Meeqqanut Isumaqatigiissutaa unioqqutinneqartoq meeqqat illersuisuata Aviâja Egede Lyngep isornartorsiuinera Sermitsiaq.AG-mit sapaatip akunnerata siuliani allaaserineqarpoq.
- Qaasuitsup Kommuniata nunaqarfiini illoqarfiinilu meeqqat atugassarisaat assigiinngitsorujussuupput. Tamatuma saniatigut nalinginnaasumik takusarsimavarput FN-ip meeqqanut isumaqatigiissutaanik toqqaannartumik unioqqutitsisoqartartoq, Aviâja Egede Lynge oqarpoq.
Oqaloqatigiittoqartariaqartoq
Qaasuitsup Kommuniani isumaginninnermut ilaqutariinnermullu ataatsimiititaliami ilaasortaq, Bendt B. Kristiansen, Inuit Ataqatigiit, oqarpoq, meeqqat illersuisuat pissusissamisoorluni taamatut oqariartuuteqarpoq.
- Ajornartorsiulli pillugu kommunalbestyrelsi Aviâja Egede Lyngelu oqaloqatigiittariaqarput. Oqaloqatigiinneq tusagassiuutitigut ingerlanneqartariaqanngilaq, Bendt B. Kristiansen Sermitsiaq.AG-mut oqarpoq.
Kommunimi borgmesteriugallartoq Jess Svane assigalugu ajornartorsiut pillugu oqaaseqarusunngilaq.
- FN-ip meeqqanut isumaqatigiissutaa Qaasuitsup Kommuniani unioqqutinneqarpa?
- Meeqqat illersuisuat peqatigalugu kommunalbestyrelsimi oqaloqatigiissutigineqartariaqarpoq. Oqareernitsitullu tamanna tusagassiuutitigut ingerlanneqartariaqanngilaq, Bendt B. Kristiansen oqarpoq.
Jess Svane borgmesterimut Ole Dorphimut Siumumeersumut allagaqarpoq ajornartorsiut pillugu kommunalbestyrelsimi oqaloqatigiissutigineqartariaqarnera tassani kissaatigalugu.