Imigassaq
Naalakkersuisut imigassarsinissamut periarfissaq matuniaraat
Siunissami immiaararsiniaraanni immikkoortortani immikkut inissitani taamaallaat pisisoqarsinnaassaaq. Naalakkersuisut nutaamik inatsisiliornermikkut periarfissaq imigassat matunerisa kingorna annertuumik imigassarsisinnaanissamut ammaassisoq matuniarpaat
Immiaaqqat, viinnit imigassallu kikkut tamat ornittagaanni takussaasumiitinneqassanngillat.
Inatsisissami nutaami imigassamik tuniniaanermut pilerisaarinermullu tunngasumi maanna tusarniaassutigineqalersumi, Naalakkersuisullu ukiaru akuersissutigineqartussatut neriuutigisaanni taama allassimavoq.
Inatsisissatut siunnersuut naapertorlugu pisiniarfiit ussassaarutitut naqitertitaanni, inuit qarasaasiakkut attaveqaqatigiittarfiini Nunatsinnilu aviisini, imigassat aalakoornartortallit ussassaarutiginissaat siunissami inerteqqutaalissaaq.
Atuaruk: Kalaallit Nunaanni kalaallit qallunaanit imigassartornikinnerupput
Atuineq annikillisissagaa
- Taama inerteqquteqarnikkut aalakoorniutigiinnarlugu imertartut ikilisinniarnerinut inuusuttullu atuivallaarnerisa millisinniarnerinut peqataanissaq siunertaavoq. Ussassaarutini aalakoornartortalinnik imigassartortarneq iluatsitsilluarnermut inuiaqatigiinnilu qaffasissumik inissisimanermut nallersuunneqartartoq, inatsisissatut siunnersuummut oqaaseqaatini allassimavoq.
Oqaaseqaatini taakkunani pissutsit piviusut oqaaseqarfigineqanngitsut ilaatigut tassaapput nunani allamiut aviiserpassui, atuagassiaat assigisaallu – annerusumik qallunaatuut – imigassanut tunngasunik ussassaarutinik ulikkaartut Kalaallit Nunaanni pisiarineqarsinnaammata; soorlumi aamma tv-kkut kanalini akiliilluni isiginnaarneqarsinnaasuni minnerunngitsumillu internetimi immiaaqqanut piseqqusaaruterpassuaqartarmat, tamakkumi inuusuttorpassuit smartphonesitik qarasaasiatillu atorlugit iserfigisinnaasarpaat.
Atuaruk: Imigassap inerteqqutaalernissaa isumaqatigiinngissutaasoq
‘Imigassat angallanneqarsinnaasut’
Inatsisissatut siunnersuummi paragraffit nutaat imigassanik aalakoornartortalinnik tuniniaaffinnik assiaqutsersuinissamut tunngasut sunniuteqarnerussagunarput.
Tamatuma kinguneranik pisiniarfiit nioqqutissanik ulluinnarni atugassanik tuniniaasut ininik immikkoortunik pilersitsissapput, taakkua immikkut pisiniartitsisoqassallutik immikkullu isertarfeqassallutik: Pisiniarfiit minnerusut pisiniarfiup iluani iikkanik assiaqutsersuiinnarsinnaassapput – allatulluunniit assiaqutsiisinnaassallutik – taamaalillutik ussernartorsiorfiusinnaasut takujuminaannerulersillugit.
Naalakkersuisut inatsisissatut siunnersuummi nutaami oqallissaarutigaat, ulluinnarni unnukkut arfineq pingasut tungaannut imigassarsisoqarsinnaalissasoq aamma arfininngornikkut ualikkut sisamat tungaannut – aamma ukiutoqqami imigassanik tuniniaasoqarsinnaalissasoq.
Atuaruk: Misissuineq nutaaq: Kalaallit imigassaq saperaat asuli oqariartaasiinnaavoq
Allaaserisaq tamaat AG-mi uani sapaatip akunnerani saqqummertumi atuaruk, ullumikkut pisiniarfinni pisiarisinnaavat. Aviisi aamma uani pisiarisinnaavat: