Monday, January 9, 2017 - 15:40

Matusinissamik oqariartuuteqarneq Naalakkersuisut tusaatissatut tiguaat

Nuuk Imermi utertitat
Assi.: Leiff Josefsen
Nuuk Imeq matuneqarnissaanut oqariartuuteqarneq Naalakkersuisunut aalassatsitsinngilaq. Namminersorlutik Oqartussat matusinissap oqallisigineqalerneranut akisussaaqataasut, Sulisitsisut isumaqarput

Namminersorlutik Oqartussat immiaaqqat sodavandillu puiaasannik utertitseriaatsimik nutaamik sulissuteqarput.

Kisianni tamanna suli inissinneqanngilaq, tamatumalu Nuuk Imermi siulersuisut ataatsimeersuarnerminni suliffeqarfik 2018-ip naanerani matuneqartussanngorlugu innersuussutigitippaa.

Tusaatissatut tiguneqartoq
Namminersorlutik Oqartussalli taamatut oqariartuuteqarneq eqqissillutik tiguaat.

- Nuuk Imermik nalunaarut Naalakkersuisunit tusaatissatut tiguneqarpoq, pinngortitamut avatangiisinullu naalakkersuisoqarfimmit tusagassiuutinut nalunaarummi tamanna oqaartigineqarpoq.

Suliffeqarfiup nammineq sorusunnerluni sussannginnerlunilu aalajangissavaa.

Atuaruk: Nuuk Imeq matuneqarnissamut innersuussutigineqartoq

- Nuuk Imeq A/S aktianik piginneqatigiiffittut namminersortutut maskiinanut aningaasaliisoqassanersoq aammalu suliffeqarfik ingerlaannassanersoq pillugu nammineerluni aalajangiisussaavoq.

Sulisitsisut: Namminersorlutik Oqartussat kigaappallaarput
Nuuk Imermi siulersuisut suliffeqarfiup maanna matunissaanik sioorasaaruteqarnerannut, Namminersorlutik Oqartussat akisussaaffeqartut, Sulisitsisut illuanik isumaqarput.

Namminersorlutik Oqartussat poortuutissanut nalunaarummik suliaqarnissamut piffissamik atorluaasimanngitsut, kattuffik isumaqarpoq.

Atuaruk: Immiaaqqat tunisat allanngoriannginnerat pitsaasumik Nuuk Imermut tupaallaataavoq

- Naalakkersuisut ukiorpassuarni taarserartut poortuutissanut nalunaarummik 2002-meersumik nutarterinissamik nalunaaruteqartarput. Taamaakkaluartoq kalaallit immiaaqqanik imeruarsaatinillu nioqqutassiortut siunissami puiaasat pillugit malittarisassanut paasisaqarnikuunngillat, Sulisitsisut pisortaat, Brian Buus Pedersen, tusagassiuutinut nalunaarummi allappoq.

Misissueqqaarniartut
Puiaasanut utertittakkanut malittarisassat nutaat piariingajalinngitsut, Naalakkersuisut erseqqissarpaat. Suliaq misissorneqaqqaassaaq.

- Misissuinerit tunngavigalugit puiaasanik utertitseriaaseq atuuttoq ingerlaannassanersoq, naleqqussarneqassanersoq imaluunniit utertitseriaatsimik nutaarluinnarmik, atuuffiusumik annertusititsiviusinnaasumik atuutsitsisoqalissanersoq Naalakkersuisut isummerfigissavaat, naalakkersuisoqarfik allappoq.

Atuaruk: Nuuk Imiup kingunissat ernummatigai

Suliaq tamanna piaartumik ingerlanneqartariaqartoq, Sulisitsisut isumaqarput.

Namminiilivinnissamut, pinngortitamut, avatangiisinut nunalerinermullu naalakkersuisoq nutaamik naleqquttumik poortuutissanut nalunaarummik nutaamik, nioqqutissiortunut, atuisunut avatangiisimullu pitsaasumik pilersitseqqullugu Sulisitsisut kaammattuutigaat, Brian Buus Pedersen oqarpoq.

Kisermaassisoq
Maanna aaqqissuussaaneq malillugu, Kitaani immiaaqqat sodavandillu Nuuk Imermi puiaasat puui akuerineqartut atorlugit kisimi nioqquteqartoqarsinnaavoq.

Nuuk Imermik piginneqataasut, Carlsberg aamma Royal Unibrew, kalaallit immiorfiit minnerusut marluk eqqaasanngikkaanni, kisimik immiaaqqanik imermillu Kitaani pisiniarfinni nioqquteqarsinnaapput.

Tunumi Avannaanilu puiaasanik utertitsisanermik aaqqissuussaanermik peqanngilaq.

Kommuneqarfik Sermersuup Nuuk Imeq 36 procentinik piginneqataaffigaa, Carlsberg aamma Royal Unibrew tamarmik 32 procentimik piginneqataapput.

Nuuk Imeq matuneqarnissaanut siulersuisut innersuussinerat malissanerlugu, taakku aktiaatillik pingasut marsimi ataatsimeersuarnerminni aalajangissavaat.

Seneste nyheder / Nutaarsiassat kingulliit