True North Gems Greenland
LNS Greenlandip rubinisiorfik akiliisinnaajunnaartoq tiguaa
Namminersorlutik Oqartussanit akuersissutit pissarsiarinissaat tullinnguuppoq
Qaammatip aallartinnerani True North Gemsip akiliisinnaajunnaarneranut akisussaasunngortut, aaqqiissummik nassaarniarlutik ilungersuuteqarnerminni annertuumik alloriarput, taamaalilluni Kalaallit Nunaata rubinisiornera aallarteqqinniassammat.
Atuaruk: Akiliisinnaajunnaarnerup kingorna: Nutaanik aningaasaliisussanik pissarsiniarsarisut
Tunniussineq
Akisussaasuusut ullumikkut akiliisinnaajunnaartup aamma kalaallit ingerlatseqatigiiffiata, LNS Greenland A/S-ip akornanni tunniussinermut isumaqatigiissusiortitsimavoq, taamatullu akiliisinnaajunnaartut pigisaanik nalilinnik tunniussilluni.
LNS Greenland ingerlatseqatigiiffimmi annertuumik piginneqataasooreerpoq, taannalu Aappaluttumi Qeqertarsuatsiaat eqqaani rubinisiorfimmut ingerlatsinermut akisussaasuuvoq. LNS Greenlandip maanna aningaasaliissutissat inissinnissai akisussaaffigilerpaa, taamaalilluni rubinisiorfik ingerlaqqinniassammat.
Alloriarneq tulleq tassaassaaq, akuersissutit pineqartut tunniunneqarnissaat pillugirt Namminersorlutik Oqartussanik oqaloqateqarnissaq.
Aaqqiissut pitsaanerpaaq
- Tamatumunnga tunngatillugu akisussaasut isumaqarput, rubinisiorfiup LNS Greenland A/S-imut tunniunneqarneratigut ingerlaqqinnissamut pitsaanerpaamik tunngaviliisoqartoq, taamaalillunilu aningaasanik pisassalinnut aaqqiissutissaq pitsaanerpaaq anguneqarpoq, eqqartuussissuserisoq Peter Schriver ilisimatitsivoq, taanna Nuummi Nuna Advokaterineerpoq.
Akisussaasup aappaa tassaavoq, eqqartuussissuserisoq Henrik Selschau Poulsen, Advokatfirmaet Bruun og Hjejlemi Københavnimeersoq.