True North Gems Greenland
Akiliisinnaajunnaarnerup kingorna eqqartuussisserisup aaqqiissuteqapallattoqarnissaa upperaa
True North Gems Greenlandip sapaatip-akunneri marluinnaat qaangiuppata allanit tiguneqarluni aaqqiissuteqarfigineqarnissaa akisussaasup utaqqivaa
Pilersaarutit malillugit pisoqarpat, Aappaluttumi Qeqertarsuatsiaat eqqaani rubinisiornermik suliniut akiliisinnaajunnaartoq, sapaatip-akunneri marluinnaat qaangiuppata nutaamik piginnittoqalersinnaavoq.
Atuaruk: Akiliisinnaajunnaarnerup kingorna: Nutaanik aningaasaliisussanik pissarsiniarsarisut
Akiliisinnaajunnaartumut akisussaasuusup aappaanit, eqqartuussissuserisoq Peter Schriverimit, neriulluartumik Sermitsiaq.AG-mut oqariartuut taama nipeqarpoq.
Oqaatiginianngikkallarai
Taassumali suliniummik pisisussaasinnaasut oqaatiginissai kissaatiginngilaa, aamma assersuutigalugu qallunaat soraarnerussutisiassaateqarfii imaluunniit nunanit allanit aningaasaliisussaqarnersoq oqaatigiumanagu.
Atuaruk: Piginneqataasup rubinisiorfik suli upperaa
Isumaqatigiissut
Akiliisinnaajunnartumut akisussaasoq naapertorlugu, suliniummit piginnittunngortup True North Gems Greenlandip pisinnaatitaaffigisimasai pisussaaffiilu tigussavai.
Ingerlatseqatigiiffiullu nutaap aamma Namminersorlutik Oqartussanit rubinisiornissamut akuersissut tigussavaat, taamatullu aamma piginnittoq nutaaq assersuutigalugu avatangiisinut akuersissutinut aamma qularnaveequtinut malittarisassanut tunngatillugu pisussaaffeqassaaq, kiisalu IBA-mut isumaqatigiissut, Kalaallit Nunaatalu iluaqutserneqarnissaa, najukkami sulisoqarnermut tunngatillugu.
Atuaruk: Norskit annertuumik piginneqataasut akiliisinnaajunnaarneq ugguaraat
Akuerineqaqqaassasoq
Peter Scrhiverip neriuutigaa, suliniut sapaatip-akunneri arfinillit arfineq-pingasulluunniit ingerlanerini aallarteqqissinnaassasoq, piginnittoq nutaaq teknikkikkut aamma aningaasaqarnikkut piumasaqaatit naammassinerai Namminersorlutik Oqartussat akuereqqaartussaammassuk.
- Pilersaarutit malinneqariarpata, una akiliisinnaajunnaarneq aqqummi kigaallaataassaaq, suliniullu novembarip aallartinnerani aallarteqqinneqaqqissinnaassaaq, Peter Schriver oqarpoq.
Atuaruk: Rubinisiorfiup akiliisinnaajunnaarnera Inatsisartut nerriviannut ilineqarpoq