aligoq aappaluttoq
Akiliisinnaajunnaarnerup kingorna: Nutaanik aningaasaliisussanik pissarsiniarsarisut
Akiliisinnaajunnaartumut akisussaasup maanna aatsitassarsiornermik suliniutip ingerlateqqinneqarnissaa sulissutigaa
Ingerlatseqatigiiffik aatsitassarsiortoq True North Gems Kalaallit Nunaanni Eqqartuussivimmi ataasinngornermi eqqartuussinermi akilisinnaajunnaartutut nalunaarutigineqarpoq.
Nammineq nalunaaruteqartut
Akiliisinnaajunnaartup akisussaasuata aappaa, eqqartuussissuserisoq Peter Schriver, Nuummi Nuna Advokaterineersoq ilisimatitsivoq, ingerlatseqatigiiffik akiliisinnaajunnaarluni nammineq nalunaaruteqartoq.
Tassani ingerlatseqatigiiffiup siulersuisuisa paasivaat suliffeqarfik akiliisinnaassuseqanngitsoq - ingerlanneqaqqinnissaanullu taamaammat tunngavissaqanngitsoq.
Iluatsinngitsoq
- Ullut arlaqanngitsut matuma siorna ingerlatseqatigiiffiup siulersuisuisa paasivaat, aningaasaliissutissat piffissami sivisuumi isumaqatiginninniutigisimasatik iluatsinngitsut. aningaasat 130 millionit koruunit nioqqutissiulerniaraanni atorneqartussaapput, Peter Schriver nassuiaavoq.
- Aamma Tuluit aningaasaliisartut ingerlatseqatigiit isumaqatiginiarneqartussaagaluarput, kisianni taakku suliffeqarfik tunuarpoq. Tamannalu tunngavigalugu siulersuisut aalajangerput, akiliisinnaajunnaarnermik nalunaaruteqarneq kisimi periarfissaalertoq.
Aningaasaliisussat nutaat
Eqqartuussissuserisoq Henrik Selchau Poulsen Advokatfirmaet Bruun og Hjejlemi Københavnimeersoq peqatigalugu ingerlatseqatigiiffimmi akiliisinnaajunnaartumi pisut misissussavaat.
- Maanna suliniutip ingerlateqqinneqarnissaanut periarfissat misissorpagut, aningaasaliisartullu tulluartut attaveqarfigereerpagut. Kisianni naggataagut pisariaqalissaaq, True North Gemsip akuersissutaa ingerlatseqatigiiffimmut allamut nuunneqarnissaa Namminersorlutik Oqartussat akuersissutigisariaqarnera, Peter Schriver oqarpoq.
Taarsigassat
Pigisat ilaanniipput sanaartortitsineq, aamma Namminersorlutik Oqartussanut 8,8 millionit koruunit toqqortat, ilaatigut aatsitassarsiorfiup matuneqarnissaanut aningaasaqarnissaanut qulakkerutit.
Illuanik taarsigassat katillugit 100 millionit koruuniupput, taakku annerpaartaat suliniummut aningaasaleqataasunut taarsigassaapput, tassa Canadami True North Gems, suliffeqarfik sanaartornermik suliaqartoq LNS kiisalu aningaasaliinissamut piginneqatigiiffik Namminersorlutik Oqartussanit pigineqartoq Greenland Venture.