Sermersooq
Kommunit inuttunersaanni ammanerulernissaq
Maanna kommunalbestyrelsimut ilaasortat allaffeqarfimmut apeqqutaat, allaffeqarfimmiillu akissutigineqartut takuneqarsinnaalerput
Kommuneqarfik Sermersuumi innuttaasut, Nunatsinni kommunit inuttunersaanniittut, maanna kommunimi pisut malinnaaffigilluarsinnaanerulerpaat.
Tassami maanna kommunalbestyrelsimut ilaasortat allaffeqarfimmut apeqqutaat, allaffeqarfimmiillu akissutigineqartut komminip nittartagaani takuneqarsinnaalerput.
Atuaruk: Aningaasaqarnermut pisortaq pisortaaninngorallarpoq
Alloriarneq tulleq
Alloriarnerup tullerissavaa kommunalbestyrelsimut ilaasortat Nunaqarfinnilu Aqutsisuni ilaasortat namminneq piumassusertik tunngavigalugu aningaasatigut soqutigisaminnik toqqakkatullu ilaasortaaffimminnik nalunaarsuisinnaalernissaat, tamakkulu sermersooq.gl-imi takuneqarsinnaasalerumaarput, Sermersooq ilisimatitsivoq.
Inunnut paasissutissanut inatsit decembarip aallaqqaataani 2016-imi atuutilissaaq, taamaattumillu paasissutissat kommunip nittartagaani decembarip 12-ianni 2016-imiit takuneqarsinnaasalernissaat naatsorsuutigineqarpoq.
Atuaruk: GE-p Sermersooq nakkutilliisoqarfimmut maalaarutigaa