GE-p Sermersooq nakkutilliisoqarfimmut maalaarutigaa

Kommuneqarfik Sermersuup kommunip ulluunerani paaqqinnittarfiinut nerisassanik, pequtinik nangernillu ukiumut 7 millioner koruuninik nalilinnik pisiortortarnini tamanut ammasumik suliarinnittussarsiuussimanngimmagu tamanna Sulisitsisut Peqatigiiffiata Grønlands Erhvervip (GE) sakkortuumik isornartorsiorpaa, taamatut paasissutissiivoq KNR:

Malittarisassanik unioqqutitsineq

Tamanna malittarisassanik unioqqutitsineruvoq, taamatut isumaqarpoq Sulisitsisut Peqatigiiffianneersoq Karsten Lyberth Klausen, taassumalu Kommuneqarfik Sermersooq Nakkutilliisoqarfimmut maalaarutiginiarpaa.

– Ajornartorsiutit annersarinngilaat isumaqatigiissuteqarsimaneq. Isumaqaannarpugut suliassaq tamanna allanut aamma suliarinnittussarsiuunneqassasoq. Taamaasilluni qulakkeerneqassammat akip appasinnerpaap pissarsiarineqarnissaa, taamaasillunilu akileraartartut aningaasaataat sapinngisamik annertunerpaamik pissarsissutigalugit, allattoqarfimmi pisortaq oqarpoq.

Immikkut isumaqatigiissut

Taarsiullugu kommunip suliassaq tamaat immikkut ittumik nioqqutissat amerlasuunngorlugit tuniniaavimmut Arctic Importimut tunniussimavaa.

Kommuneqarfik Sermersuumi aningaasaqarnermut pisortaq Lars Møller-Sørensen isumaqanngilaq kommuni tamatumani malittarisassanik unioqqutittsisoq.

20 procentinik sipaaruteqartoq

Arctic Importimik isumaqatigiissuteqarnermigut Kommuneqarfik Sermersooq siusinnerusukkut taamaasiortarsimanani ataatsikkut pisiortornermigut 20 aamma 25 procentit akornanni sipaaruteqartoq Lars Møller-Sørensen KNR-mut oqarpoq.

Suliassarlu tamatumuuna suliarinnittussarsiuunneqarsimanngimmat tamatumunnga pissutaavoq nalornissutigineqarsimammat aningaasartuutit tamarmik kommunimi eqqortumik naatsorsuutinut allanneqartarsimanersut, taamaasilluni aningaasartuutit tamakkiisumik takussutissaqartillugit. Tamakkua inissinneqareerpata kommuni suliarinnittussarsiuussisalersinnaavoq, aningaasaqarnermut pisortaq Radioaviisimut oqarpoq.