KNR
KNR-ip pisortaa soraarpoq
Ukioq ataaseq qaammallu ataaseq atorfeqareerluni KNR-ip pisortaa Søren Lennert Mortensen soraarniuteqarpoq
Søren Lennert Mortensen, KNR-imi siorna novembarip 15-iani ukiuni pingasuni atorfeqarnissaminut isumaqatigiissuteqareerluni atorfinittoq, suliffimminit maanna soraarniuteqarsimavoq.
Søren Lennert Mortensenimmi KNR-imi sulisut tallimanngornermi ataatsimiisinneranni ilisimatissimavai pisortatut atorfia maajip aallaqqaataanit 2015-imit inuttassarsiorneqalissasoq.
– Ukioq ataaseq pissanganarluinnartumik KNR-imi suliaqareerlunga atorfiga qimanniarlugu nalunaarpunga, Sisimiunullu ilaquttannut angerlarnissara piareersalerlugu. KNR-ip ineriartorteqqinnissaanut peqataanera unammisassartaqarsimaqaaq, iluarisimaarluinnakkannillu piorsaanikkut angusaqarnerput nuannaarutigaara, Søren Lennert Mortensen oqarpoq nangillunilu:
– Suliassara tassaasimavoq KNR-imi patajaatsumik ingerlatsilernissaq, nutaamik siunnerfeqalernissaq aammalu aallakaatitanik ineriartortitsinerup aallartinnissaa.
Atuaruk: Nutaarsiassat akilerneqartassanngitsut KNR-imi pisortaq isumaqarpoq
KNR-imi siulersuisut siulittaasuat Nukaaraq Eugenius KNR-imi pisortap soraarnera pillugu ima oqarpoq:
– Søren Lennert Mortensenip soraarniuteqarnera siulersuisuni ajuusaarutigeqaarput. Piffissap sivikitsuararsuup iluani KNR nutaamik siunnerfeqalersissimavaa, ineriartornerullu pitsaasup sivikitsuinnaq atorlugu anguneqarnera iluarisimaaqaarput. Siulersuisuni Søren peqatigalugu KNR-ip pisortassaanik ujaasilerpugut, naatsorsuutigaarpullu juullinngitsoq inuttassarsiuineq allagarsiunneqarumaartoq, sapinngisamillu piaartumik inuttalerniarneqassalluni.
Søren Lennert Mortensen aalajangersimavoq Sisimiunut angerlarniarluni, tassanilu illunik tuniniaasartuunini siunnersortaaninilu nanginniarpaa.
– Sisimiunut maannakkut angerlassaanga, tassanilu inuunera aamma inissarsiuussisarfiutilittut siunnersortitullu atorfiga ingerlateqqissallugit. Minnerunngitsumillu sunngiffinni aalisarneq piniarnerlu uterfigeqqissavakka, Søren Lennert Mortensen oqarpoq.