medier
KNR-p pisortartaava
KNI-mi pisortaasimasoq Søren Lennert Mortensen KNR-imi pisortanngussaaq
Søren Lennert Mortensen KNR-imi pisortatut atorfinitsinneqassaaq. Taamatut tallimanngormat ualikkut nalunaarput KNR-p siulersuisui.
Søren Lennert Mortensen novembarip 15-ianni atorfinissaaq ukiunullu pingasunut isumaqatigiissuteqarsimalluni.
Pisortaq nutaaq annertuunik unammilligassaqarpoq. KNR-p atortui pisoqalisimapput sulisullu inissiani attartukkani najugaqarput KNR-p Nuummi Kissarneqqortuunnguami illuutaata oqoqarnerujussua pissutigalugu.
– KNR-p pisortaassaa aaqqissuussaanermik ineriartortitsinermik, aqutsinermi aningaasanillu aqutsinermik misilittagaqarluarpoq. Taamaattumik Søren pisortaralugu KNR nutaamik aallartinnissaminut periarfissaqarpoq, qanga pisimasut tunullugit oqaluttuarisaaneq puigunngikkaluarlugu. KNR periusilimmik aqunneqassaaq, KNR-mik naalaartartut isiginnaartartullu pisassaannik naammagisinnaasaannillu pilersorumallugit, siulersuisuni siulittaasoq Hans Peter Poulsen oqarpoq.
Søren Lennert Mortensenip, ukiorpassuarni KNI-mi sulisimasup, KNR nutartissavaa.
– Tusagassiornerup silarsuaa allanngoriartortorujussuuvoq, Nunatsinniinnaanngitsoq nunarsuarmili tamarmi. Taamaattumik tusagassaqartitsinermi KNR-p nammineq inissisimanerata pilersinniaqqinnissaanik suliassaq annertoorujussuuvoq. Tikinniassavarput KNR sutigut nunarsuarmi pitsaanerpaassasoq, taava sinneri allat isumagiumaarpaat, Søren Lennert Mortensen oqarpoq.