Nutaarsiassat akilerneqartassanngitsut KNR-imi pisortaq isumaqarpoq

Puiguinnarsiuk.

Sermitsiaq.AG-p siunersuutaanut, tassa nittartakkatigut nutaarsiassat Sermitsiaq.AG-mi kiisalu KNR.gl-imi aatsaat akileqqaarlugit takuneqartalernissaannut eqqarsaat KNR-ip pisortaanit Søren Lennert Sørensenimit isumaqatigineqanngilaq.

Tusagassiivimmi Sermitsiaq.AG-mi pisortap Poul Krarupip Radioaviisimi apersorneqartilluni oqarpoq nittartakkatigut tusagassiat siunissami aatsaat akileqqaarlugit takuneqarsinnaalernissaannut siunersuuteqarpoq.

Poul Krarupip apersorneqarnermini oqaatigaa naak nutaarsiassat nittartakkatigut akeqanngikkaluartut nittartakkatigut suliaqarneq akikitsuinnaanngitsoq.

- Kisimiilluta nittartakkakkut akiliisitsisalersinnaanngilagut, KNR.gl-imi aamma akeqanngitsunik nutaarsiassanik saqqummiisarpoq. Inuit nittartakkakkut atuarniarunik akiliisalertariaqaraluarput, aamma KNR.gl-imut atuarniarunik, Poul Krarup oqarpoq.

KNR-ip pisortaa tassunga ima oqaaseqarpoq:

- KNR-i inuiaqatigiinnut sullissisussaatitaavoq, ileqqorissaarnermik tamatigoortumillu tusagassiinernik annertuumik akisussaaffeqartoq. Taamaattumik kikkut tamarmik, akissaqanngikkunik akissaqarunilluunniit, nutaarsiassatsinnik atuarsinnaatitaanissaat periarfissaalluni, Søren Lennert Mortensen oqarpoq.

- Inuiaqatigiiusugut KNR-ip ingerlanneqarneranut akileeqataasarpugut. Akileeqataasarnitta saniatigut, KNR-imi nutaarsiassat atuarnuiaraanni, akileeqqaartarnissap suna siunertarissaneraa takusinnaanngilara, Søren Lennert Mortensen oqarpoq.

DR-ip annikillereerpaa
Aviisimi Journalistenimi februaarimi allaaserineqarpoq, DR ullormut nutaarsiassat qulit 15-illu akornanni nittartakkatigut nutaarsiassiisassasut, kiisalu immikkoortuni assigiinngitsuni nutaarsiassat pingasut sisamallu missaanni suliarineqartassallutik.

Danmarkimi tusagassiiviit peqatigiiffiannit isornartorsiorneqareerpoq DR-ip licensimik akiliisitsisarnera, tassani sumiiffiit mikinerusut tusagassiinikkut unammillerneqarpallaartartut oqaatigineqarluni.

Bornholmimi aviisit ilaannit Bornholms Tidendemit DR-ip nittartakkatigut nutaarsiassaliortanerat annikillineqarmat nuannaarutigineqarpoq.

- Annoncenik aningaasaliiffigineqartarluta licensimik akiliisitsisartunik unammillerteqarunnaarnerput nuannaarutigaarput, Dan Qvitzau journalisten.dk-mut oqarpoq.

Danmarkimi qaammammut licensimut 203 koruuninik akiliisoqartarpoq. Kalaallit Nunaanni akileraarnikkut akiliisoqartarluni.

KNR-ip pisortaa Søren Lennert Mortensen neriorsuigaluarluni Sermitsiaq.AG-mut tutsaqaqqinngilaq.