suliffiit
KNAPK nammineq biologeqalerpoq
Aalisartut piniartullu kattuffiat KNAPK piniagassat aalisakkallu amerlassusaannik naliliisarnermi sunniuteqarusuppoq
Aalisartut piniartullu kattuffianni KNAPK-mi maanna biologimik atorfinittoqarpoq. Tassaavoq biologitut ilinniarsimasoq Bjarne Lyberth aamma Ababsitut ilisimaneqartoq maanna biologitut avatangiisillu pillugut siunnersortaanertut atorfeqalersoq. Atortinitsitsinermi KNAPKp anguniarpaa aalisakkat piniagassallu amerlassusaannik naliliisarnerup tamatigoortuunerunissaa.
Atuaruk: Piniartut: Qilalukkanik amerlanerusunik pisaqarsinnaanerput pisinnaatitaaffigaarput
KNAPKmit qangali kissaataavoq kattuffiup namminerisaminik biologeqalernissaa. Aalisartummi piniartullu biologit naliliinerannut isumaqataanngissinnaasarput. Kingullertut assersuutissaavoq qilalukkat qernertat oqaluuserineqarnerat tassani KNAPK piumasaqarmat qilalugartassaat pingasoriaammut amerlisariaqartut.
Atuaruk: Finn Karlsenip biologit tusaanianngilai qilalugartassallu ilallugit
Atuaruk: Qilalukkat qernertat pisassat amerlinissaat biologit nangartarpaat
Piniartut soqutigisaat
Maanna piniakkat killilersukkat oqallisaaneranni Bjarne Lyberthip KNAPK ikiussavaa piniartut soqutigisaasa saqqummilaartinnissaannut.
- Ukiut 21 hunderedessaat atorpavut nunarsuarmioqatigiinnerup atuuffigisai. Taamaammat pingaaruteqarluinnarpoq aamma uagut nammineq biologeqarnissarput soqutigisatsinnut tunngavilersuisinnaasumik aammalu soorunami Pinngortitaleriffimmi biologinik suleqateqarsinnaasumi, KNAPK-mi siulittaasuugallartoq Leif Fontaine Sermitsiaq.AG-mut oqarpoq.
Pinngortitaleriffimmi biologit tassaapput aalisakkat piniakkallu pillugit siunnersuisartut. Maanna KNAPK uumasut amerlassusaannik naliliisarnermi sunniuteqaqataarusuppoq.
- Pinngortitaleriffimmit anguniagaareerpoq piniartut ilisimasaasa tusaaniarneqarnerunissaat. Kisianni sineriassuarput isorartoorujussuuvoq sumiiffimmiit sumiiffimmut assigiinngisaarfioqisoq. Biologerput piniartut ilisimasaannik katersinermi suleqataasinnaavoq taamalu Pinngortitaleriffimmeersut immersueqataaffigalugit, Leif Fontaine oqarpoq.
Bjarne Lyberth siornatigut inuit issittormiut siunnersuisooqatigiiffianni ICC-mi atorfeqarpoq.