Piniartut: Qilalukkanik amerlanerusunik pisaqarsinnaanerput pisinnaatitaaffigaarput

Upernaviup pigisaani qilalukkat qernertat amerlasoorsuullutik takkusimaarsut piniartut oqarput, pisassiissutillu 30-nik amerlineqarnissaat piniarnermut naalakkersuisumut Finn Karlsenimut kissaateqarput.

Nunaqarfinni inuussutissarsiornikkut Upernavimmi paasiniaaqatigiittoqareersoq taama nalunaartoqarpoq.

Qilalukkanik qernertanik 100-nik immikkut pisassiisoqarnissaa piniartunit kissaatigineqarpoq. Nunatsinnilu Naalakkersuisut piffissaq ungasinnerusoq isigalugu tunngaviusumik pisassiissutit tamakkiisut pingasoriammik qaffattariaqaraat isumaqarlutik.

- Piffissami maannakkorpiami Upernaviup pigisaani qilalukkat qernertat amerlasoorsuullutik takkusimaarput. Piniartullu erseqqissaatigaat qilalukkat qernertat ukiuni kingullerni amerliartupiluulersimasut. Tamannalu pissutigalugu qalerallit tammakaqqarallarput qaleralinnillu aalisarneq unittooqqavoq.

Piniartut qilalukkanik qernertanik 100-nik immikkut pisassiisoqarnissaa Leif Fontainemit ilalerneqarpoq.

- Pingasoriaammik qilakukkanik qernertanik pisassiisoqartalernissaa Naalakkersuisunit isummerfigineqartariaqarpoq, Leif Fontaine oqarpoq.

Allanngortiterinissaq
Nannunik pisassiinerit aamma amerlineqassasut Upernavimmi piniartunit kissaatigineqarpoq. Aamma aarrinik pisassiisarneq naammagineqanngilaq.

Taamaattumik Nunatsinni Timmissanut Nalunaarutip maannamut atuuttup aammalu Nunap inuinik immikkoortitsutut taasariaqartup Upernaviup pigisaaniittunut inunnut atuisunut nam-maqatigiittumik naleqqusarnissaa pisariaqarluinnartutut isigineqartoq oqaatigineqarpoq.

- Qangaaniit taakkuninnga isumalluutinik atuisut illersorneqartariaqarput! Tamannalu piaarnerpaamik aaqqinneqartariaqalerpoq, Leif Fontaine oqarpoq.