Finn Karlsenip biologit tusaanianngilai qilalugartassallu ilallugit

Qimusseriarsuarmi qernertanik qilalugartassat 30-nik ilaneqannginnissaannik biologit inassutaat Naalakkersuisut malinnianngilaat. Pisassat amerlinissaat suli akuerineqanngikkaluartoq, taamaattoq aalisarnermut, piniarnermut nunalerinermullu naalakkersuisup Finn Karlsenip Siumumeersup pisassat ilaneqarnissaat Naalakkersuisunut inassutigereerpaa.

Atuaruk: Qilalukkat qernertat pisassat amerlineqarnissaat biologit nangartarpaat

Siumut sinnerlugu Inatsisartunut ilaasortaq Nikolaj Jeremiassen paragraf 37 naapertorlugu Naalakkersuisunut apeqquteqarpoq Qimusseriarsuarmi qernertanik qilalugartassat amerlineqalersaarnersut maanna qernertat 68-it pisarineqareermata pisassiissutit tallimanik sipporlugit. Aalisarnerli suli aallartinngilaq puisillu amiinik tunisineq uninngalluni qerititsiviit ulikkaaqqanerat pissutaalluni.

Qangatut piniassavaat
Qimusseriarsuarmi qernertanik qilalugartassat 30-nik ilaneqarnissaanni siunersuut Naalakersuisut Pinngortitaleriffimmut tusarniaassutigisimavaat. Taakku akissutaat ersarippoq. Immikkut 30-nik qernertanik Qimusseriarsuarmi pisasseeqqinneq nungusaataanngitsumik atuinermut innarliissaaq.

Biologilli mianersoqqusinerat maajip naalernerani Naalakkersuisunut anngunneqartoq Finn Karlsenip tusaanianngilaa.

- Aalisarnermut, piniarnermut nunalerinermullu naalakkersuisup aqutsiveqarfimmut Upernavimmut qilalukkanik qernertanik 30-nik immikkut pisassiisoqarnissaa Naalakkersuisunut innersuussutigivaa piumasaqaatigalugu taakkunani qilalukkat qernertat 20-it ileqqutoqqat atorlugit piniarnissaat tassa qajaq atorlugu seqqortoqannginneranilu unaaq tuukkartalimmik naaleqqaarnissaat, Finn Karlsen Nikolaj Jeremiassenimut akissummini allappoq.

Aalisarnermut, piniarnermut nunalerinermullu naalakkersuisoqarfik qanittumi Qaasuitsup Kommunianut attaveqassamaarpoq immikkut pisassiissutit agguataarneqarnissaat pillugu.

Hans Enoksen Partii Naleraq sinnerlugu aamma piumasaqarpoq Qimusseriarsuarmi qernertanik qilalugartassat ilaneqassasut.