Nuussuineq
KIMIK: Nuuk kisimi eqqumiitsuliornermi suliaqarfiusinnaavoq
Eqqumiitsuliornermik ilinniarfiup nuunneqarnera Nunatsinni eqqumiitsuliornermik suliaqartartunut eqquinerlussaaq, eqqumiitsuliortut peqatigiiffiat, KIMIK, taama isumaqarpoq
Naalakkersuisut siulittaasuata, Kim Kielsenip, Eqqumiitsuliornermik Ilinniarfiup Aasiannut nuunneqarnissaa, KNR-imut oqaluttuarimmagu, eqqumiitsuliortunit tupaallaatigineqarpoq.
Aalajangiinermimi eqqumiitsuliortut peqataatinneqarsimanngitsut, KIMIK paasissutissiivoq.
Atuaruk: Nussuineq 500 millionit koruuninik akeqassaaq
- Eqqumiitsuliornermik Ilinniarfiup nuunneqarsinnaanera, eqqumiitsuliortunit peqataatitaqarani – taamaallaalli Eqqumiitsuliornermi Ilinniarfiup pisortaata kisimi peqataaffigineqarsimanera tupaallaatigineqarpoq, KIMIK-ip siulittaasua, Lisbeth Karline Poulsen, oqarpoq.
Nuummi katerserugaasiviit atorneqartut
Eqqumiitsuliornermik Ilinniarneq Aasianni ingerlanneqartalissappat, siunissami eqqumiitsulionermik ilinniartut eqqumiitsuliortunik isumassarsiorfissaarunnissaat, peqatigiiffiup aarlerinartoqartippaa.
Atuaruk: Ilinniarneq Nuummi taamaallaat ingerlanneqartariaqanngilaq
- Eqqumiitsuliortunngorniat eqqumiitsuliortunik isumassarsiorfeqarsinnaanerat pingaarutilerujussuuvoq, Nuummimi eqqumiitsuliornermik ingerlatsiviit assigiinngillat ilaatigut taaneqarsinnaallutik Katuaq, Nuuk Kimik Eqqumiitsuliornermik Ilinniarfik, Nunatta Isiginnaartitsisarfia, FILM.GL aammalu Nuummi eqqumiitsuliornerit nipilersuusikkat illoqarfinni allani takussaanatik. Aammattaaq eqqumiitsuliortunngorniat Nuummi kulturikkut paasiniaavissaqarluareerput soorlu Nunatta atuagaateqarfiani, Nunatta katersugaasiviani kiisalu Ilimmarfimmi, Lisbeth Karline Poulsen oqarpoq.
Nuup avataanilu eqqumiitsuliornermik ilinniarfik ingerlanneqassangaluarpat akisoorujussuussasoq, taassuma erseqqissaatigaa.
Atuaruk: Ilinniarfiit nuummiik nuunneqarnissat sillimaffigeqquneqartoq
- Eqqumiitsuliornermik Ilinniarfik nuunneqassangaluarpat akisoorujussuussaaq, ilinniarfimmimi ilinniartitsisut amerlanerpaat Nuummi najugaqartuupput. Ilinniarfik tamatigoortumik ilinniartitsiseriaaseqassapput, ilinniartitsiartortartut aggersarneqartussaassapput tamannalu ilinniarfimmut akisoorujussuanngussasoq taassuma oqaatigaa.
Ilinniarfiit amerlanerusinnaapput
Peqatiiffiup Aasianni eqqumiitsuliornermik ilinniarfeqalernissaa ajorinngilaat, ataatsimillu eqqumiitsuliornermik ilinniarfeqassappat Nuummiittaqariaqarpoq, tassanimi ilinniartut attaveqarluarsinnaanerusut, Eqqumiitsuliortut peqatigiiffiat isumaqarpoq.