isumaginninnermut siunnersortit
Ilinniarneq Nuummi taamaallaat ingerlanneqartariaqanngilaq
Avannaani aamma isumaginninnermut siunnersortinngornianik ilinniartitsisinnaavugut, Nuka Kleemann Ilulissani Perorsaanermik Ilinniarfimmi rektori naqissusiivoq
Ilinniarfik Nuummiinngimmat ilinniarnerup pitsaassusaata appasinnerunissaa ernummatigineqartariaqanngilaq. Nuka Kleemann Perorsaanermik Ilinniarfimmi rektori naqissusiivoq.
- Nuummi ilinniarnermi atugassarititaasut ataqqillugit oqarusuppunga ilinniarfik nuunneqarpat ilinniarfiup naqqaniit aallarteqqinneqarnissaa ernummatigineqartariaqanngitsoq, Nuka Kleemann tusagassiutinut paasissutissiinermini taamak oqaaseqarpoq.
Ilinniartitaanermut naalakkersuisoqarfiup isumaginninnermut ilinniarfiup Ilulissanut nuunneqarnissaanik pilersaaruteqarnera Ilisimatusarfimmi Isumaginninnermut immikkoortortaqarfiup siornatigut ernummatiginerareerpaa.
Atugassarititaasut ajunngitsut
Rektorip oqarneratut Ilulissani isumaginninnermut ilinniarfimmi atugassarititaasut ajunngillat, ilinniartullu nutaat illuni nutaani naammassineqaqqammersuni tikiluaqqusaapput.
- Sinerissami naligiimmik ineriartorneq ammanikkut, suleqatigiinnikkut tatigeqatigiinnikkullu pilersinnaasoq isumaqarpugut, taamaattoqarpallu suliassat Nuup avataani aamma naammassineqarsinnaalissapput, Nuka Kleemann taakkartuivoq.
Sukkasuumik aallartisarneq
Ilinniarfiup nuunneqarneratigut ilisimasat misilittakkallu piulernissaat naatsorsuutigineqarpoq taamaammallu Isumaginninnermut ilinniarfimmi atuartitsinerup ingerlanneqarasuarsinnaanera Ilulissani ilinniarfimmit nalilerneqarpoq.
- Ilinniartitsisunik ilinniakkamut tulluartunik atuartitsisinnaasunik pissarsinissarput unammillernarsinnaasarpoq, Nuka Kleemann oqarpoq nangillunilu:
- Taamaattoqartarnerali sungiusimaannarparput. PI/SPS ukiorpassuarni ingerlaqqiffiusunut ilinniakkanik ingerlatsinerminik misilittagaqarluarpoq, soorlu aamma ilisimatusarnermi-/ineriartortitsinermilu aaqqissuussanut assigiinngitsunut nunap sinnerani ingerlanneqartartunut peqataasarnernut misilittagaqarluartugut, naqissusiivoq.
Suliffissat inuttaqanngitsut qanillillugit
Ilinniarfik Ilulissanut nuunneqarpat isumaginninnermut siunnersortitut ilinniarsimasut sumiiffinni assigiinngitsuni amigaatigineqartut ajornannginnerusumik atorfinitsinneqartalernissaat Isumaginninnermut ilinniarfimmi rektorip qilanaaraa.
- Isumaginninnermut siunnersortinik pikkorissunik ilinniartitsisarneq pingaartinneqartariaqartoq isumaqatigaarput, taamaasillutik isumaginninnermut siunnersortit ilinniarsimasut nunarput tamakkerlugu pigineqalissagamik - aamma avannaani tassami ukiorpassuarni annertuumik taakku amigaatigineqarput, Nuka Kleemann oqarpoq.