Tuesday, January 17, 2017 - 08:46

Kalaallit inooriaasiat pitsaanerua?

Piniartutut inooriaaseqarluni nappaateqarunnaartoqarsinnaava? Danskit aallakaatitassiaata tamanna paasiniaaffigaa
Assi.: DR / Screendump
Inooriaatsimut siunnersuisartoq Chris MacDonald DR-p aallakaatitassiaani U-turnimi nakorsaatit timersornermik peqqinnartunillu nerisaqarnermik taarserniarpai. Kalaallillu inooriaasiat maanna misissorlugu

Inuuneq iisartagartorfiunngitsoq.

Chris MacDonaldip inooriaaseq pillugu aallakaatitassiami U-turnimi DR-mi aallakaatinneqartartumi peqataatitaminut anguniagaaa. Peqataasut sukkortuupput, nappaat Nunatsinni atungaasorujussuaq Danmarkimi innuttaasunut naleqqiullugu.

Taamaakkaluartoq Chris MacDonald aallakaatitassiap aappassaanik immiunneqarnerani Nunatsinnukarpoq kalaallit inooriaasiat inuunermut iisartagartorfiunngitsumut aqqutaanersoq paasiniarlugu.

Atuaruk: Tusintillit ilisimanagu napparsimapput

- Nunarsuarmi qangatut inooriaasillit amerlajunnaarsimasut inooriaatsiminnilli nappaateqanngitsut ilinniarfigisinnaavagut. Inooriaasaasami arlaatigut illersorsimasinnaavaat, aallakaatitami Chris MacDonald oqarpoq.

Umimmanniarput

Umimmanniat marluk Johanne Juliusilu peqatigalugit ilisimatooq ilagalugu umimmanniarput.

Piniartullu marluk pinngortitami pisullutik umimmanniarnerat Chris MacDonaldimut aqqut unammillernarpoq.

- Anertikkarpunga, ikinngutigulli kalaallit marluk ingerlaarujuuginnarput soorlu susoqanngitsoq, inooriaatsimut siunnersuisartoq oqarpoq.

Sukkortut amerliartupiloortut

Aallakaatitassiaq U-turn Chris MacDonaldip nammineq isumassarsiarisimavaa. Peqataasut sakkortuumik timertimersortinneratigut nereriaatsillu allanngortinneranik nappaat annikillisinnaanersoq nakorsaatillu ikilisinnaanersut misilittarneqarluni.

Atuaruk: Nakorsaq: Imminut paaralusi

Ullutsinni inooriaaseq pissutaalluni sukkorneq type 2-diabetesimik taaneqartartoq annertusingaatsiarsimasoq ilisimatuut isumaqarput. Nappaat ukiut 50-it matuma siorna takussaanngitsoq.

- Genigut ullut tamaasa ilimasuuteqartarput. Timersorneq, inuit akornaniinneq minnerunngitsumillu pinngortitamiinnissamut. Timerput piniartunngortussanngorlugu ilusilersugaavoq. Johannep Juliusillu timertik atortorujussuuaat nerisaqarluarlutillu, Chris MacDonald aallakaatitassiami inerniliivoq.

Aallakaatitassiaq nangeqattaartoq DR-imi isiginnaarneqarsinnaavoq, DR-illu nittartagaani aamma takuneqaqqissinnaalluni.

Seneste nyheder / Nutaarsiassat kingulliit