Inatsisitigut isumannaassusermut soqutiginninneq annertooq

Kalaallit Nunaanni inatsisitigut isumannaassuseq pillugu nalunaarusiaq ataasinngormat saqqummerpoq. Nuummilu ippassaq tamanna pillugu annertuumik oqallittoqarpoq.

Advokatsamfundetip nalunaarusiaq suliaraa, inatsisitigullu isumannaassuseq qanoq nukittorsaavigineqassanersoq arlalinnik innersuussuteqarpoq.

- Nalunaarusiaq pillugu oqallinneq pitsaavoq, eqqartuussissuserisoq Martin Lavesen, suleqatigiissitami nalunaarusimik suliarinnittumeersoq oqarpoq.

Atuaruk: Eqqartuussiviit aalajangiisarneri kukkunertaqartut

Peqataasorpassuit
Innuttaasut pisinnaatitaaffii arlalitsigut ajornartorsiorfiusut, nalunaarusiami tikkuartorneqarput. Kalaallillu eqqartuussiveqarfiini apeqqutit tamakku asuliinnaanngitsumik tiguneqartut ersarippoq.

- Oqallilluni ataatsimiinnermut peqataasoqarluarnera nuannersumik tupaallaatigaara. Eqqartuussiveqarfinni tamaneersut tusarnaariartut peqataasut 60-it missaanniipput, Martin Lavesen oqarpoq.

Isummat assigiinngitsut
Nalunaarusiami inuinnarnik eqqartuussisoqartarneq patajaatsuunngitsoq ilaatigut oqaatigineqarpoq. Nalunaarusiamik allattut inuinnarnik eqqartuussisoqarluni aaqqissuussineq tapersersorpaat, kisianni tamakkiisumik ingerlanissaa saniatigut pingaartuusoq oqaatigaat.

- Nalunaarusiami inerniliussanut soorunami kikkut tamarmik isumaqataanngillat. Kisianni oqallinnermik pilersitsinissaq siunertaavoq, taamaalillunnilu ajornartorsiutaasut arlalitsigut isiginiarneqassapput.

Immikkoortut tallimat
Suleqatigiissitamiittut eqqartuussiveqarfinni susassaqartut amerlasuut oqaloqatigisimavaat. Taamaalillunilu inatsisitigut isumannaassusermut tunngatillugu isiginniffiit arlallit sammivaat.

- Immikkoortunik tallimanik innersuussaqarfitsinnik saqqummiussivugut. Immikkoortullu taakku tamarmik tigussallugit pingaaruteqarpoq, Martin Lavesen naqissusiivoq.

Immikkoortut tallimat tassaapput, eqqartuussiveqarfiit, illersuisut, politiit, pinerluttunik isumaginnittoqarfik kiisalu pinerluuteqarsimasullu pineqaatissinneqartarnerat. Tamatuma saniatigut nalinginnaasunik innersuuteqarpoq.

Atuaruk: Siunnersorneqarneq allanngortinneqarpoq

Nunami illersuisoq siuariarnerusoq
Ajornartorsiutaannaanngillalli. Maanna nunami illersuisumik atorfinitsitsisoqalermat, Martin Lavesenip annertuumik siuariartoqarnerarpaa. Tamanna 2010-mili periarfissaasimavoq, kisianni maanna aatsaat pivoq.

Atuaruk: Inatsisitigut siunnersuisarfik: Inatsisiliortarneq paasiuminaatsoq

- Nunami illersuisutut atorfiup kiisami inuttassarsiuunneqarnera siuariaat pingaartuuvoq. Ilitsersuineq pitsanngoriartillugulu aamma ilinniaqqinneq tamatuma nukittorsassavaa. Tamanna illersuisunut aamma eqqartuussissuserisunut iluaqutaassaaq, Martin Lavesen naliliivoq.