inatsisitigut isumannaatsuuneq
Inatsisitigut siunnersuisarfik: Inatsisiliortarneq paasiuminaatsoq
Innuttaasut pisinnaatitaaffitik ilisimasariaqarpaat, inatsisitigut siunnersuisarfik IKIU oqarpoq
Inatsisitigut isumannaatsuunermi equngasoqarpoq. Advokatsamfundetip nalunaarusiami saqqummiuteqqammigaata tamanna takutippaa.
Inatsisiliortarnerup paasiuminaattarnera ajornartorsiutit ilagigaat, suleqatigiissitat nalunaarusialiortinneqartut tikkuarpaat.
Tamanna Inatsisartut inatsisinik allanngortitsigaangamik allannguutit allaganngorlugit ataatsimut katersorneqarneq ajornerannik pissuteqarpoq. Taamaattumillu inatsisit katiterneqaqqaartariaqartarput.
- Pissutsit taamaanneri suleqatigiisitap isumaa malillugu, inatsisitigut isumannaatsumik ingerlaniarnermi unammillernartuupput, tassami inatsisinik, taakkuninngalu atuutsitsinissamik ilisimasaqarnissaq tunngaviulluinnarmat, inuiaqatigiit inatsisinik atuilluassappata, nalunaarusiami allaqqavoq.
IKIU-mi ulapinneq
Inatsisit paasiuminaannerat Inatsisitigut Siunnersuisarfik IKIU-mi ersarissumik malugineqartarput, taakkununnga saaffiginnittartut amerliartuinnarput.
- Inatsisitigut siunnersuisarfik IKIU ukiut arfinillit affaatalu ingerlanerini piunermini, siunnersorneqarumasut 6.000-t tungaanut siunnersornikuuai, ukiormannaannarlu siunnersorneqarumasut 1.200-t missaaniipput, IKIU-mi allatoqarfimmi pisortaq Sofia Rossen oqarpoq.
Innuttaasut pisinnaatitsaaffitik ilisimaniassammatigit IKIU nukittorsartarneqartariaqartoq, Advokatsamfundetip nalunaarusiami aamma innersuussutigaa.
- Suliap annersaa nammineq piumassutsimik ingerlanneqartarpoq, eqqartuussissuserisut inatsisilerituullu akissarsiaqaratik sulisarput, kisianni IKIUp inatsisitigut ikiorsiisarnermik allaffeqarfiata, sulisullu Kalaallit Nunaanni angalasarnerisa aningaasalersornissaat ajornakusoortinneqarpoq, nalunaarusiami allaqqavoq.
Suliaq imaannaanngitsoq
Advokatsamfundetimit taperserneqarneq IKIU-mi nuannaarutigineqarpoq.
- Inatsisitigut siunnersuiarfik IKIU, Kalaallit Nunaanni innuttaasunut imaannaanngitsumik suliaqarneranik nalilerneqarnera nuannerpoq, allattoqarfimmi pisortaq Sofia Rossen oqarpoq.
Taassumali aamma suliniuteqarneq nukittorsarneqartariaqartoq tikkuarpaa, taamaalilluni innuttaasut pisariaqartitaminnik ilitsersuunneqartarniassammata, IKIU kajumissutsimik sulisunik 14-inik siunnersuisartoqarpoq.
Advokatsamfundetip nalunaarusiaa pillugu ullumi nalunaaqutaq 14.00 Nuummi oqallilluni ataatsimiittoqassaaq.