Inatsisartut ataatsimiittarfissaat nutaaq oqallisigineqarpoq

Inatsisartuni Suleriaatsiumut Ataatsimiititaliap nutaamik Inatsisartut ataatsimiittarfittaarnissaat siunnersuutigaa, taannalu ullumikkut tallimanngornermi oqaluuserineqarpoq.

Inuit Ataqatigiit aamma Siumut ataatsimiititaliami amerlanerussuteqarput, taakkulu siunnersuut taperserpaat.

Sanaartukkap Nuummi Naalakkersuisut allaffeqarfiinut illorsualiaasimasup sananeqarneranisut aningaasalersorneqarnissaa eqqarsaatigineqarpoq, tassa pisortat namminersortullu peqatigiinnerisigut BOT-mik (Build, Operate and Transfer – Sanaartoriarlugu, Ingerlateriarlugu Tunniullugu) taaneqartartumik.

Atuaruk: D IA-mut: Inatsisartut ataatsimiittarfissaannut tapersersuinersi taamaatissiuk

Erseqqissumik aamma isumaqatigiinneq
- Ullumikkut qinikkat kisiisa eqqarsaatiginagit siunissami qinigaasartussat aamma eqqarsaatigalugit Inatsisartoqarnerput nutartertuassagutsigu ineriartortittuassagutsigulu ullumikkut sulinermut killissarititaasut ineriartortinnissaannut sapiissuseqarlunilu piumassuseqartoqartariaqarpoq, siunnersuummi ilaatigut taama allaqqavoq.

Sanaartorfissamik aalajangersimasumik suli nassaartoqanngilaq, siulittaasoqarfilli sanaartorfiusinnaasumik nutaamik ujarlerneq ingerlateqqissappagu suliniutip siunissaa pillugu Inatsisartut erseqqissumik aalajangernissaat pisariaqarpoq.

Atuaruk: Inatsisartut ataatsimiittarfiissaannut D naaggaariiginnarpoq

Maanna illu pisoqalisoq
Suleriaatsimut Ataatsimiititaliami ilaasortat tamarmik isumaqatigiissutigaat, maanna Inatsisartut allaffeqarfiat ataatsimiittarfiallu naleqqukkunnaarsimasoq.

- Taamaalilluni aningaasalersueriaatsikkut siunnersuutigineqartukkut siunissami qinigaasartussat sullivissaannik sanaartorneq, suliniutinit allanit pisortanit aningaasalersorneqartunit aningaasaliissutinik tigusinngikkaluarluni ingerlanneqassaaq, ataatsimiititaliaq allappoq.

Atuaruk: Inatsisartut nutaamik ataatsimiittarfittaassanngillat