Nuuk
Inatsisartut nutaamik ataatsimiittarfittaassanngillat
Inatsisartut aalajangigaata piviusunngortinneqarnissaanut partiit akornanni amerlanerussuteqartoqarunnaarsimasoq Inatsisartut Suleriaatsimut Ataatsimiititaliaata ataatsimiinnerani paasinarsivoq
Inatsisartut Allattoqarfiat annertuumik isornartorsiorneqarpoq nutaamik ataatsimiittarfimmik sanasoqarnissaanik siunnersuuteqarmat.
Pilersaarutigineqartulli taamaatiinnarneqarput.
Tamanna tusagassiutinut nalunaarutigineqarpoq.
- Inatsisartoqarfimmik nutaamik sananissaq pillugu Inatsisartut aalajangigaat uanga Inatsisartut siulittaasuattut unneqqarillunga ingerlanniarsimavara. Taama aalajangerneq Inatsisartunut ilaasortat amerlanerussuteqarluartut november 2013-imi taperserpaat. Aalajangiinerulli taassuma piviusunngortinnissaa tapersersorluarneerussimasoq paasivara. Tamanna tusaatissatut tiguara, Inatsisartuni siulittaasoq oqarpoq.
- Tamatuma kinguneraa suliniut taamaatiinnarneqartariaqarmat aammalu Inatsisartut Inatsisartunullu ilaasortat inini maanna atorneqartuniiginnartariaqarnerat atugaasalu taamaaginnartariaqarnerat, Lars-Emil Johansen oqarpoq.