Nunalerinermut Ataatsimiititaliaq
IA: Savaatillinnut ikiorsiiniarneq naalakkersuisooqatigiinnit kinguarsarneqartoq
Inuit Ataqatigiit isumaqarput ataatsimiititaliamut ilaasortap ataatsip atsiorumannginnera savaatillit ikiorserneqarsinnaanerannik periarfissamik kinguarsaanertut isigisariaqartoq
Inuit Ataqatigiit politikkikkut oqaaseqartartuat Aqqaluaq B. Egede isumaqarpoq, silap pissusaata pinngortitallu atugassarititaasa naatsorsoruminaannerisa kingunerannik savaateqarnermik, nersutaateqarnermik naatitsinermillu inuussutissarsiuteqartut aningaasarsiorsinnaanermikkut innarligaasut politikkikkut immikkut ittumik iliuuseqarfigineqartariaqartut.
Atuaruk: Nunalerisut panernersuarmit eqqugaasut
- Savaateqarnermik inuussutissarsiutip piunermini nalaassimanngisaminik nalaataqarnera immikkut pisutut immikkullu iliuuseqarfissatut isigisariaqarpoq, Aqqaluaq B. Egede tusagassiuutitigut nalunaarummi allappoq.
Inuit Ataqatigiillu nunalerinermut ataatsimiititaliamut ilaasortaatitaasa sakkortunerpaamik eqqugaasunut immikkut ittumik aningaasaliisoqassasoq piumasarisimavaat.
Suliassaq uninngatiinnarneqartoq
IA-p politikkikkut oqaaseqartartua naapertorlugu suliassaq uninngatiinnarneqarsimavoq ilaasortat arlaata atsiorumannginnera pissutaalluni.
- Ataatsimiititaliap siulittaasua attavigaarput suliap qanoq ingerlanera sumullu killinnera paasiniarlugu. Akivoq ilaasortap arlaata atsiorumannginnera pissutaalluni suliassaq uninngasoq, Aqqaluaq B. Egede allappoq.
Taamaalilluni savaatillit nersutaatillit nunalerinermillu ingerlatsisut ilungersunartumik inissisimanerannut ataatsimiititaliap ikiuunniarneranut innarliiniarnertut isigineqarsinnaasumik suliniartoqarnera assut tupaallannartutut isumaqarfigaa.
Amerlanerussuteqartoqaraluartoq
Aqqaluaq B. Egede erseqqissaavoq, ataatsimiititaliami amerlanerussuteqartunit immikkut ikiorsiinissaq aningaasaliinissarlu kaammattuutigineqaraluartoq.
- Inuit Ataqatigiit pisunik naammagisimaarinninnata pisut pinartut pimoorussamik suliarineqartarnissaat, tuaviuussassallu tuaviortumik suliarineqartussatut nalilerneqartut uninngatiinnarneqartannginnissaat, politikkikkullu aalajangiiffigineqartunik akornusiiniarnertut paasineqarsinnaasumik iliuuseqarneq akueriuminaatsoq unitsilluinnarneqarnissaa inassutigaarput, Inuit Ataqatigiit politikkikkut oqaaseqartartuat naggasiivoq.
Aamma atuakkit:
Savaatillit ernumasut taperserneqartut
Ane Hansenip nunap panernerujussua pissutigalugu nunaatillit ikiorserneqarnissaat ujartorpaa