Kommune Kujalleq

Nunap panernerujussua pissutaalluni nunaatillit ikiorserneqarnissaat Ane Hansenip ujartorpaa

Nunaatillit ikiorserniarlugit aningaasaateqarfiliortoqarnissaa IA-mi politikkerip siunnersuutigaa

Nunap panernerujussuata pissutigisaanik savaatillit nerukkaatissanik amigaateqarput ilaatigut

Kalaallit Nunaata kujataani nunap panernerujussua pissutaalluni nutaatillit eqqorneqarput. Taamaattumik Namminersorlutik Oqartussat iliuuseqartariaqartoq, aalisarnermut, piniarnermut nunalerinermullu naalakkersuisuusimasoq Ane Hansen, Inuit Ataqatigiit, siunnersuuteqarpoq.

- Kujataata kommunia peqatigalugu ullumikkutut panernersuarmik nalaataqartoqartillugu ukiunut tulliuttunut eqqanaarnissaq, eqaatsumillu iliuseqarsinnaalernissaq siunertaralugu sillimmatinik aningaasaateqarfiliorsinnaaneq eqqarsaatigeqqullugu, tusagassiutinut nalunaarummi Ane Hansen nassuiaavoq.

Ineriartortitsinissaq
Inuussutissarsiutip siunissamut ingerlariaqqinnissaa pillugu Naalakkersuisunut aamma apeqquteqarpoq.

Siorna Inatsisartut upernaakkut 2014-mi ataatsimiinnerani Aqqaluaq B. Egedep Inuit Ataqatigiit nunalerineq pillugu imminut pilersornerup siuarsarneqarnissaa siunertaralugu siunnersuuteqarpoq, Inatsisartunilu ilaasortat tamarmiullutik isumaqatigiissutigaat siunnersuut 15 million koruuninik aningaasartalerlugu akuersaarneqassasoq. Ullorli manna tikillugu Naalakkersuisunik soriartoqanngitsoq Ane Hansen oqarpoq.

- Inuit Ataqatigiit piumasareqqissavarput Inatsisartut akuersaariigaat naammassiniarlugit Naalakkersuisut ersarinnerusumik timitaliiniarlutik sulisariaqalersut, maanna pisut erloqinarluinnartut savaatillit nunalerinermillu inuutissarsiutillit panernersuarmik nalaataqarneranni aamma piaartumik iliuseqarfigalugu, Ane Hansen allappoq.

Powered by Labrador CMS