inuttanut inatsit
GE: Enoksenip sukateriniarnera aaqqiissutissaanngilaq
Kilisaatini inuttaqartitsisarnermut Hans Enoksenip sukaterinialikkersaarnera Sulisitsisunit (GE) isornartorsiorneqarpoq.
Kilisaatini inuttat 60 procentii ullutsinni kalaaliusussaapput. Aalisarnermut piniarnermut naalakkersuisup Hans Enoksenip maanna tamanna sukateriffigissallugu Sermitsiaq.AG-mut marlunngormat oqaatigaa.
Atuaruk: Enoksenip inuttaqarnermut inatsisit sukaterniarpai
Kilisaatinili inuttat kalaalliunissaannut procenti qanoq qaffaavigineqassanersoq Hans Enoksenip suli aalajangiutinngilaa.
Hans Enoksenillu iliuuseriniagaanut Sulisitsisuni pisortap Brian Buus Pedersenip Sermitsiaq.AG-mut ima oqaaseqarfigaa:
- Umiarsuaateqarfiit arlallit ilinniarnissamut periarfissaqartitsisarput taamaasilluni nunaqavissunik inuttaqarsinnaasarlutik. Inuussutissarsiortullu amerlasuut unammilligassaraat meeqqat atuarfianit ingerlaqqittartut amerlagisassaanngimmata. Imarsiornermik ilinniarfiup - inuussutissarsiutinillu ilinniarfiit allat - ilinniartoqalernissaq siunertaralugu pilerisaarisarput atorfininnissamullu periarfissaqartitsillutik. Meeqqat atuarfianiilli ingerlaqqittartut ikippallaarput. Taamaattumik Hans Enoksen aaqqissutissaanngitsumik iliorniarsarivoq, inuttanullu sukaterinialikkersaarnera nunaqavissunik tamakkiisumik inuttassaqarani.
GE oqallittoqarnissaanik kajumissaarivoq
Brian Buus Pedersenip Hans Enoksen siunissaq ungasinnerusoq isigalugu iluamik aaqqiisoqarniassammat oqallitsitsitseqqullugu kajumissaarpaa.
- Inuusuttut umiatsiaararsortut amerlanerusut qanoq ilillugit aalisariutinut pilerisutsilersinnaanerinik suliniuteqartoqarnissaanik Naalakkersuisut kajumissaarusuppagut. Inuusuttut aalisarnermik inuussutissarsiuteqartut siunissami umiatsiaararsortut amerlivallaannginnerussammata, akuersissuteqalersinnaanermi ajornarsigaluttuinnarmat, Sulisitsisuni pisortaq siunnersuivoq.
Immikkut akuersissut ukiuni marlunni
Umiarsuaateqarfiit immikkut akuersissutinik tunineqartarneri unitsinneqartariaqartut Hans Enoksenip sapaatip akunnerata siuliani nalunaarutigaa.
Atuaruk: Enoksenip kalaallit kilisaatini amerlanerulersikkusuppai
Allagaatinilli takunnissinnaaneq aqqutigalugu aalisarnermut piniarnermullu naalakkersuisoqarfiup ukiuni marlunni kingullerni immikkut akuersissummik ataasiinnarmik tunniussisimasut atuarneqarsinnaavoq.
Enoksen nassuerpoq
"Oqaatigisamik taama amerlatiginngitsut" Hans Enoksenip marlunngormat nassuerutigaa.
Immikkullu akuersissummik atasiinnarmik tunniussisoqarsimaneranut Sulisitsisut pisortaata ima oqaaseqarfigaa:
- Hans Enoksenip naalakkersuisoqarfiani kisitsisit aallavigalugit kilisaatersortut nunaqavissunik inuttaqartinniarneqarneri iluatsissimasutut isikkoqarpoq. Tassami ukiuni kingullerni marlunni immikkut akuersissut ataasiinnaq tunniunneqarsimammat.