Enoksenip kalaallit kilisaatini amerlanerulersikkusuppai

- Kalaallit aalisariutaataanni inuttalersuisarneq pillugu Namminersorlutik Oqartussat nalunaarutaat 2011-meersoq naapertorlugu immikkut akuersissuteqartitsilluni inuttalersuineq pillugu malittarisassanik akuersissuteqartarneq atorunnaartariaqarpoq.

Aalisarnermut piniarnermullu naalakkersuisoq, Hans Enoksen (PN), Namminersorlutik Oqartussanit tusagassiuutinut nalunaarummi oqarpoq.

Nalunaarummi allassimasut naapertorlugit aalisariummi 24 meterinit angitigisumi inuttat ikinnerpaamik 60 procentii Kalaallit Nunaanni najugaqartutut inuit nalunaarsorsimaffianni nalunaarsimasuussapput, Kalaallit Nunaannilu inuit aqqisa nalunaarsorsimaffianni qaammatisiutit ukiuini kingullerni marlunni nalunaarsorsimassallutik.

Kalaallit amerlanerusut inuttaalersinneqarlik
- Nalunaarummi allassimasut naapertorlugit kilisaataatilinnut immikkut akuersissuteqartarnerput killeqartariaqalerpoq, nunat allamiut aalisartui aalisariutini nunatsinneersunut inuttaatittassallugit, Hans Enoksen erseqqissaavoq.

Nunatsinni kilisaatini inuttaakutsoorsinnaasunik inuusuttoqartoq isumaqarami.

Atuaruk: Kinamiut 30-t tunisassiorfinni sulissapput

Qaammarsaanernik ujartuisoq
- Isumaqarpunga aalisartitsinermik aallussaqartut imarsiornermik ilinniarfik suleqatigalugu qaammarsaasariaqartut, ilaatigut qaammarsaassutigineqarluni ilinniarfimmi aalisarneq pillugu, fiskeriassistentitut, ilinniartoqarsinnaasoq. Ilinniarneq naammassippat kilisaatini inuttaalersoqarsinnaalluni.

- Kalaallit aalisariutaataanni nunanit allaneersunik inuttaqartitsinngikkaluarluni aalisarnissamut tamanna siunissamut aqqutissaavoq pitsaasoq, aalisarnermut naalakkersuisoq Hans Enoksen oqarpoq.

Atuaruk: Nunassittartut ilinniarsimanngitsut amerliartuinnarput