kilisaatinit aalisarneq
Enoksenip inuttaqarnermut inatsisit sukaterniarpai
Kilisiaatini inuttat 60 procentii ullumikkut kalaallit akileraartartuunissaat piumasaqaataavoq. Inatsit taanna aalisarnermut piniarnermullu naalakkersuisup Hans Enoksenip allanngortinniarpaa.
Inuttaqarnermut malittarisassat immikkut ittumik aaqqiissuteqarfigineqartarnissaat, sapaatip akunnerani kingullermi Hans Enoksenip nalunaarutigigaluarpaa. Aalisarnermi suliffiit kalaalliniiginnarnissaat, nunanit allaneersunit tiguneqannginnissaat qulakkeerniarlugu Enoksenip siunertarigaluarpaa.
Sermitsiaq.AG apeqquteqaateqarnikkut allagaatinik takunnikkumanermigut, ukiuni marlunni kingullerni aalisarnermut naalakkersuisoqarfik immikkut ittumik akuersissutinik tunniussaqarsimanersoq paasiniaavoq.
Akissut tupaallannartoq
Enoksenip oqariartuutigisaanut sanilliullugu naalakkersuisoqarfimmit akissut tupaallannarpoq:
''Immikkut ittumik akuersissut ataaseq, taanna inuttanut marlunnut aamma ningittagarsorluni aalisartunut marlunnut''-
Tamanna tunngavigalugu Hans Enoksenip Sermitsiaq.AG-mut nassuerutigaa, ''oqaatigineqartutut nalunaarutiginnittarnerit taama amerlatiginnginnerat eqqortuusoq''-
Aamma atuaruk: Enoksenip kalaallit kilisaatini amerlanerulersikkusuppai
Tamatumali Hans Enoksen taamaatiinnartinngilaa. Inuttaqarnermut malittarisassat allanngortinneqarnissaat, taassuma maanna nalunaarutigaa.
- Kilisaatini inuttaqarnermut malittarisassat sukaterneqassapput, taamaalilluni kalaallit inuttat maanna 60 procentiusumit amerlanerulersinneqassallutik, Hans Enoksen ilisimatitsivoq.
Taassuma procentia qanoq annertutigissanersoq suli aalajangiussimanagu, Sermitsiaq.AG-mut ilisimatitsivoq.
Avaleraasartoorniarneq unammillernartoqartoq
Avaleraasartoorniartalernermut tunngatillugu Hans Enoksen nangilluni oqarpoq:
- Utaqqiisaasumik kilisiaatit nunanit allaneersut kalaallisut erfalasulersorneqartarnissaat sulissutigaarput. Tamatumunnga aalisarnermut taamaammat inatsisit qanoq innerannut erseqqissaanissamik pisariaqartitsivugut. Kalaallit inuttat sapinngisamik amerlanerpaa Nunatta imartaani aalisartariaqarput, taanna naqissusiivoq.
Akileraartussaatitaasoq
Nalunaarut naapertorlugu kalaallit inuttat umiarsuarni 24 meterinit takinerusuniittut, amerlassusaat minnerpaamik 60 procentiunissaat piumasaqaataavoq. Kalaallit Nunaannilu ukiuni marlunni adresseqarluni inunnik nalunaarsuiffimmiissimagaanni 'inuttat kalaaliuneranik' nalilerneqartarput, tamatuma saniatigut Kalaallit Nunaanni akileraartussaatitaasimasariaqarpoq.
Makku inuttatut taaneqartarput: angallatip naalagaa, aquttut, igasut, trawlbas, fabrikkimi aqutsisut aamma fabrikkimi siulittaasut.