GA: Qinersineq ataatsimoortitsilissaaq nukittorsaassallunilu

Inatsisartunut qinersinissaq 28. november ingerlanneqassaaq. Tamanna aalajangiunneqarpoq Naalakkersuisuni ilaasortat sisamat Aleqa Hammondip nunatta karsianik atuisarsimanerata kinguneranik Naalakkersuisut uppisillugit ataatsikkut tunuarmata.

Kalaallit Nunaanni Sulisitsisut Peqatigiiffiat, GA, maanna isumaqarpoq qinersinerit ataasiakkaarlutik pingaaruteqarluinnassasut akerariittut inissisimaneq, partiini sorlerniinneq apeqqutaatillugu kukkusumik naalakkersuinikkut ingerlatsineq innuttaasunillu avissaartuutsitsineq taamaatinneqassappata

- Inatsisartut naalakkersuinermik ingerlatsisussanik pimoorussisunik, nunamik tamarmik eqqarsaatiginnittunik, pisariaqarluinnartunik aaqqissuusseqqinnissanut piumassuseqarlutillu piginnaanilinnik aammalu Nunatta tamarmi naalakkersuinikkut aningaasaqarnikkullu toqqammavissaanik pisariaqarluinnartumik pilersitsisinnaasunik qinersinissaq, qinersisartut akisussaaffigat.

Atuaruk: Sermitsiaq.AG-mi pisortaq: Nuna annertuumik avissaartuuffiuvoq

Siammasissumik suleqatigiinneq pisariaqartoq
Kalaallit Nunaanni Sulisitsisut Peqatigiiffiat najoqqutaralugu naalakkersuinermik ingerlatallit nuimanerit arlallit oqaatigereerpaat, qinersisoqareerpat naalakkersuinikkut siammasissumik suleqatigiinnissaq pisariaqartoq.

- Nunarput aningaasaqarnikkut ajalusoornissamut ima qanitsigaaq, naalakkersuinikkut makeqqinnissaq pisariaqarluinnartoq anguniarlugu siammasissumik suleqatigiinnikkut annertuunillu aaqqissuusseqqinnikkut aatsaat nunami atugarissaarneq inuillu atukkamikkut naligiinnerulernissaat qulakkeerneqarsinnaalluni.

- Qinersisartut naalakkersuinermillu ingerlatallit ilungersortumik qinnuigissavavut akisussaassuseqartumik iliuuseqaqqullugit. Qinersisartut naalakkersuinermillu ingerlatallit nassuerutigisariaqarpaat Nunarput ajornartorsiortoq, naalakkersuinikkut aalajangiinissat imaannaanngitsut pisariaqartut, tamattalu ataatsimoorluta kivitsisariaqartugut, GA allappoq.

Atuaruk: Avissaartuunneq annertooq: Naalakkersuisut pingasut tunuarput

Piviusorsiortumik qineqqusaartoqarnissaa kaammaattuutigaat
2012-imi 2013-imilu aningaasaqarnikkut kinguariarneq ilungersunarpoq, ukiorlu manna kinguariarneq tamanna suli sakkortunerulerluni nangissimalluni, tamatumunnga patsisaallutik aatitassarsiornikkut ikummatissarsiornikkullu ingerlatsinissaagaluit takkutinngitsoorsimanerat, aalisarnikkut kinguariarneq, takornariaqarnerup appariarsimanera aammalu illuliortiternikinneruneq sanaartornikinnerunerlu.

-Nunatta aningaasaqarnera mianernartorujussuuvoq, ataatsimullu isigalugu aaqqissuussaanikkut unammilligassaqarpugut, aatsaat arlalitsigut aaqqissuusseqqinnikkut ileqqaarnikkullu iluarsineqarsinnaasunik. Taakku aatsaat suliarineqareerpata, aningaasaqarnikkut imminut napatilernissamut tunngavissamik pilersinneqarsinnaapput.

Taamaammat GA isumaqapoq qineqqusaartut sinnattuaqinaveersaartariaqartut aningaasarpassuarnillu nalilinnik qineqqusaaruteqarnaveersaartariaqartut. Aamma partiit aaqqiiniutinik siunnersuuteqartariaqartut, GA isumaqapoq:

- Qinersisoqareerpallu naalakkersuinikkut suliniaqatigiiffiit Inatsisartuniilerunik aaqqiagiinnginnitik saqitsaannitillu tunuartillugit siammassasissumik atasinnaasunillu suliniuteqalertariaqarput – taamaaliornikkut Nunarput ataatsimoortilerniarlugu nukittorsarniarlugulu aammalu nunarsuarmioqatinut upperilersinniarlugu Nunarput tassaasoq aningaasaliiffigissallugu pilerinartoq, GA taama isumaqarpoq.

Atuaruk:Inatsisartunut qinersisoqassaaq novembarip 28-ani