Aleqap atornerluinera
Inatsisartunut qinersisoqassaaq novembarip 28-ani
Naalakkersuisunut siulittaasuugallartup Kim Kielsenip aalajangerpaa Inatsisartunut qinersisoqassasoq, taama aalajangerpoq Aleqa Hammond pillugu annertuumik isornartorsiuisoqareersoq
Inatsisartunut qinersisoqartussanngorpoq novembarip 28-ani.
Tamanna Naalakkersuisunut siulittaasuugallarput Kim Kielsenip tusagassiortunik katersortitsinermini nalunaaquttap 17.00-ip missaani nalunaarutigaa.
Nick Nielsen, Steen Lynge aamma Siverth K. Heilmann naalakkersuisutut tunuarlutik nalunaarutigineqarpoq pingasunngornermi.
Aleqa Hammondip partiia nalunaaruteqarpoq, Siumumi siulittaasutut tunuarsimasoq aamma nalunaaruteqartoqarpoq pingasunngornermi.
Inatsisartut Allattoqarfiat immikkut ittumik tusagassiortunik katersortitsissaaq pingasunngornermi nalunaaqutaq 21.00.
Inatsisartunut kingullermik qinersisoqarpoq martsip aqqaneq aappaanni 2013-mi.
Naalakkersuisut siulittaasuata Aleqa Hammondip nunatta karsianit 106.363,27 koruuninik namminerminut ilaquttaminullu atuisimanera pillugu taama pingasunngornermi kinguneqartitsisoqarpoq.
Kukkunersiuinermut Ataatsimiititaliamit nalunaarutigineqartareerpoq Aleqa Hammond nunatta karsianit 106.363,27 koruuninik namminerminut ilaquttaminullu atuisimasoq. Taakku maajip 28-anit 2013-mit maajip 21-anut 2014-mut aningaasat atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.