Avissaartuunneq annertooq: Naalakkersuisut pingasut tunuarput

(MALUGINIARUK: Atassut Naalakkersuisooqataajunnaarpoq - qinersisoqarnissaa piumasaraat nalunaaqutaq 10.08 saqqummiunneqarpoq, taamaattumik naalakkersuisut pingasut tunuarput)

Ilinniartitaanermut, kultureqarnermut, naligiissitaanermut ilageeqarnermullu naalakkersuisoq Nick Nielsen, Siumut, inuussutissarsiornermut aatsitassarsiornermullu naalakkersuisoq Siumumeersoq Jens-Erik Kirkegaard kiisalu peqqissutsimut attaveqarnermullu naalakkersuisoq Atassummit Steen Lynge naalakkersuisutut tunuarput.

Nalunaaqutaq 10.00 tusagassiortunik katersortitsisoqassaaq.

Naalakkersuisut siulittaasuata Aleqa Hammondip nunatta karsianit 106.363,27 koruuninik namminerminut ilaquttaminullu atuisimanera pillugu naalakkersuisut pingasut kinguneqartitsillutik tunuarput.

Illuatungiliuttut Naalakkersuisut siulittaasuannik Siumumeersumik Aleqa Hammondimik tatiginninnginnermik taasititsinerat Siumumit Atassummiillu pinngitsoortinneqarpoq marlunngormat. Kukkunersiuinermut ataatsimiititaliap qulaajaanerani sulinngiffeqassalluni.

- Isumaliutissiissummi – saqqummiunneqaruni – Nunap Karsiata pisuni arlalinni
akiliutigeriaannagassatut taarsigassarsivittut atorneqarsimanera
allanngortinnavianngilaa. Iliuutsit aalajangiinerillu isumaqatigisinnaajunnaaraanni qimaguttoqartariaqarpoq. Taamaammat ullaaq manna nalunaarutigaarput Naalakkersuisuni ilaasortaajunnaarluta, marluullutali Siumumi naleqartut inunnillu isiginneriaatsit suli sorsuutigissavagut, Nick Nielsen Jens-Erik Kirkegaardilu tusagassiutinut nalunaarummi nassuiaapput.

- Ajoraluartumilli Inatsisartuni marlunngormat marluulluta aamma malugaarput holditsinni allamut sangusoortoqartoq iliuutsillu illersorneqarsinnaanngitsut illersorlutigit. Marluulluta misigaarput Naalakkersuisuni siulittaasutta Inatsisartut Kukkunersiuinermut Ataatsimiitsitaliaata isumaliuutissiissutaa utaqqisariaqanngikkaa, kisianni iliuutsini pissusissamisoortutut kinguneqartittariaqaraa tunuarlunilu. Inatsisartut inatsisiliortuusut
tamat oqartussaaneranni innarligassaannginerat pingaaruteqarpoq – misigivugullu tamanna ullumikkut sumiginnarneqartoq.

Steen Lynge aamma tunuarpoq
Tusagassiutinut nalunaarummi Steen Lynge aamma Naalakkersuisutut tunuarluni nalunaaruteqarpoq:

- Ullaaq manna Naalakkersuisut siulittaasuat Atassutillu siulittaasua nalunaarfigaakka Naalakkersuisunut ilaasortatut tunuarlunga. Isiginngitsuusaarsinnaanngilarput ulluni makkunani Inatsisartut kukkunersiuinermut ataatsimiititaliaanit Inatsisartullu ilaasortaannit amerlaqisunit – taakkua sulisitsisorivavut – Naalakkersuisut siulittaasuat imaannaanngitsumik isornartorsiorneqarmat (maanna sulinngiffeqartoq) Naalakkersuisut taakkua ilaasortaaffigaakka.

Nangipporlu:

- Kissaatiginngilara naleqassutsit tunngavigisakka asuli sangutissallugit, maleruagassat malitassaapput aamma aningaasaqarnikkut allaffissornikkullu pissutsini isornartorsiutaasinnaasumik pisoqannginnissaanik mianerisariaqarparput. Ingerlatseriaatsimik peqartariaqaraluarpoq naalakkersuisut taamatut pinnginnissaat anguniarlugu. Naalakkersuisunit tunuarniutiga namineq naleqartitakka tunngavigalugit aalajangiussimavara.Atassutip siulersuisuisa namminneq aalajangissavaat partii naalakkersuisunut ilaasortatut
ingerlaannassanersoq.

Aningaat maajip 28-anit 2013-mit maajip 21-anut 2014-mut aningaasat Aleqa Hammondimit atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.