Disko Line
Disko Line isornartorsiorneqaqqittoq: Kukkukuut ungalukkamiittut atungarissaarnerusut
Kathrine Andersen inooqatinilu qulimiguulimmik ilaallutik najuaqarfimminukarnerminni assartukkanik ulikkaavissimanera pissutigalugu inuunertik annaanissaa ernumassutigisimavaat. Disko Linemi pisortaaneq silatusaaqqusivoq, sillimaniarnerlu tamatigut pingaartinneqarnerpaasartoq qularnaveeqqutigalugu.
Kathrine Andersen, Qasigiannguani allaffimmiutut atorfeqartup, ukioq manna marsip qaammataani Disko Ilulissaniik Qasigiannguanut Disko Linemit angallanneqarsimanertik iluarinngilluinnarpaa.
- Qulimiguulik assartugassanik ulikkaavissimammat, ilaasugut issiaveeqqamik issiavigisinnaasatsinnik ujaasisariaqarsimavugut. Kukkukuut ungalukkamiittut uatsinnit atungarissaarnerisut takorloorsimavara, Kathrine Andersen, Disko Linemi misigisani pillugu oqarpoq.
Uiveqqajaasimasoq
Ingerlaarnerup nalaani Kathrine Andersen inooqataatalu ernumassuteqarsimapput.
- Uivernissaq qanittuaraasimavoq, ilaaffippummi nikiffissaqarpianngilaq. Isumannaalisaaneq pitsaanerpaasimanngitsoq angalanitsinni misigisimavugut. Siullermik qulimiguulik assartugassanik ulikkaarlugu usilersorneqarpoq, inissamininnguullu sinnera ilaasussanik ulikkaaqquserneqarluni, Kathrine Andersen oqaluttuarpoq.
Sillimaniarneq pingaartinneqartorujussuaq
Disko Linemilu pisortaanerata Finn Hansenip eqqissilaalluni oqaatigaa, Disko Linep sillimaniarneq pingaartittorujussuugaa.
Atuaruk: Disko Line: Qulimiguullit amerlanerit aaqqissutaanngilaq
- Qulimiguullip pisinnaasai sinnerlugit assartugassanik immerneqanngisaannarpoq, ilaasorineqartut oqimaassuserli qulimiguullip qangattarnnissaanut killigitinneqartumut atuuppoq. Tamannali pilotinit aqunneqartarpoq. Kisianni sillimaniarneq tamatigut pingaarnerpaatinneqartarpoq, Finn Hansen oqarpoq nangillunilu:
- Taamaammat takorlooruminaatsippara, angalaneq ilaasunut navianartorsiorfigineqarnissaa. Issiaviillu issiavingiuminaassimanissaat takorloorsinnaavara, taamaattoqartussaanngilarmi, Finn Hansen oqarpoq.
Suna tamarmi naleqartoq
Sooruna qulimiguulimmi assartugassat ilaasussallu ataatsimoortinnissaat pisariaqartoq?
- Suna tamarmi akeqarpoq, qularinngilarali qulimiguullit imaqaratik angalanissaat Namminersorlutik Oqartussanit orniginartinneqarnavianngitsoq. Timmisartortartulli isumaqarpata assartukkat ilanngunneqarsinnaasut taava tamanna qinngarnartuusinnaanngilaq.
Atuaruk: Disko Line Kristian Jeremiassenip isornartorsioqqippaa
Ilaasunut assartugassanulli immikkut qulimiguuleqalernissaa takorloorsinnaaviuk?
- Kissaatigisinnaangaluaqaara Namminersorlutik Oqartussat akilersinnaasaannik qulimiguulinnik tallimanik, qulinik 20-nilluunniit piareersimasuuteqarnissarput. Kiffartuussinissamik isumaqatigiissut malillugu sulivugut, taakkuli piumasaqaatitaqarput, Finn Hansen oqarpoq.
Kiffartuussineq sinaakkutit iluanni
Illit qanoq isumaqarpit, Disko Lineni tungaanit sinaakkutit iluanni pitsaasuumik kiffartuussilluarsinnaasoq?
Atuaruk: Disko Line nutaamik pisortaanertaartoq
- Sinaakkutit iluanni kiffartuussisinnaavugut. Kiffartuussisussatut sullissisussaatitaavugut. Sinaakkutilli Namminersorlutik Oqartussani suliaappuut uatsinniinngitsoq. Kiffartuussinerpulli ajunngitsumik ingerlakkipput isumaqarpunga, Finn Hansen oqarpoq.
Angallatissatut periarfissatuaq
Kathrine Andersenilu neriuutigilluinnarpaa angalanerup nalaani pitsaanerusunik atungaqartitaalernissaq.
- Ilaasoqaratik assartuinermik timmisartuussisarnerminnik, aaqqissueqqinnissaat aaqqiissutaasinnaavoq. Taamaaliornikkummi angalareerluta najukkatsinnut apuussinnaavugut, taamaammaat pitsaanerulernissaa neriuutigaara, Kathrine Andersen oqarpoq.